یومِ عاشور وچ حق گوئی تے استقامت دا سبق: صدر، وزیراعظم

اسلام آباد، پشاور (سٹاف رپورٹر، نامہ نگار، اے پی پی) صدر آصف علی زرداری نے آکھیا اے کہ یومِ عاشور اسلامی تاریخ دا اک عظیم تے بامعنی دن اے جہڑا سانوں صبر، استقامت، ایثار، حق گوئی تے اصولاں تے ڈٹے رہن دا سبق دیندا اے۔ یومِ عاشور تے اپنے پیغام وچ صدرِ مملکت نے آکھیا ایہہ دن کئی اہم تاریخی واقعیاں دی یاد تازہ کردا اے، پر تاریخِ اسلام وچ ایہدی سبھ توں نمایاں نسبت نواسئہ رسول حضرت امام حسین رضی اللہ عنہ، اہلِ بیتِ اطہار تے اوہناں دے وفادار ساتھیاں دی اس عظیم قربانی نال اے جہڑی میدانِ کربلا وچ پیش آئی۔

اوہناں آکھیا کہ بطور قوم سانوں ایہہ عہد کرنا چاہیدا اے کہ اسیں حضرت امام حسینؓ دی سیرت توں حق پسندی، اخلاقی جرات، صبر و تحمل، ایثار تے خدمتِ خلق دے اوصاف نوں اپنی انفرادی تے اجتماعی زندگی دا حصہ بناواں گے۔ وزیراعظم شہباز شریف نے اپنے پیغام وچ آکھیا کہ یومِ عاشور بے شک اسلامی تاریخ دا اک فکر انگیز دن اے جہڑا انساناں نوں ایمان، صبر و استقامت، ایثار، حق پسندی تے معاشرے دی سدھار دے بے مثال سبقاں نال سنہان (روشناس) کرواندا اے۔ واقعہ کربلا سانوں ایہہ پیغام دیندا اے کہ اصولاں تے قدراں دی پاسداری اک باوقار تے مہذب معاشرے دی بنیاد اے۔ حضرت امام حسینؓ نے اپنے طرزِ عمل نال ثابت کیتا کہ حق تے سچائی، عدل تے انصاف تے انسانی عظمت دے بچاء لئی قربانی دینا اصل وچ ظلم و جبر، ناانصافی تے باطل دے اگے سر نوان توں کتے بہتر (افضل) اے۔

چیئرمین سینیٹ یوسف رضا گیلانی نے اپنے پیغام وچ آکھیا کہ 10 محرم الحرام دا دن حق، سچائی، صبر، قربانی تے ظلم دے خلاف ڈٹ جان دی لازوال نشانی اے۔ سپیکر قومی اسمبلی سردار ایاز صادق نے حضرت امام حسینؓ، اہلِ بیتِ اطہار تے شہدائے کربلا نوں خراجِ عقیدت پیش کردیاں آکھیا کہ واقعہ کربلا حق، انصاف، حریت، صبر تے اصولاں تے قائم رہن دا ابدی درس دیندا اے۔ شہدائے کربلا دیاں قربانیاں قیامت تیکر آؤن والیاں نسلاں لئی جرات، عزم تے استقامت دی روشن مثال نیں۔

وزیراعلیٰ خیبر پختونخوا سہیل آفریدی نے اس موقعے تے اپنے پیغام وچ آکھیا کہ واقعہ کربلا حق تے باطل دے وچکار اک عظیم معرکہ سی جس وچ نواسہ رسول حضرت امام حسینؓ نے دینِ اسلام دی سربلندی لئی لازوال تے بے مثال قربانی پیش کیتی جہڑی رہندی دنیا تیکر یاد رکھی جائے گی۔ واقعہ کربلا سانوں قربانی، حق دی حمایت، باطل دی مخالفت تے ظلم دے خلاف ڈٹ جان دا سبق دیندا اے۔ سانحہ کربلا تاریخ دا عظیم واقعہ اے جہڑا ظالم تے نااہل حکمراناں دے ظلم تے بربریت دی یاد دواندا اے