پنجاب وچ بلدیاتی الیکشن 2 توں 3 مہینیاں وچ متوقع نیں: عظمیٰ بخاری
عوام نوں جلد پٹرول ہور سستا ہون دی خوشخبری ملن والی اے: میڈیا نال گل بات؛ وزیر اطلاعات دا فیصل آباد ڈویژن دا دورہ، عاشورہ دے پربندھاں (انتظامات) دا تفصیلی جائزہ لیا
لاہور، کمالیہ، فیصل آباد (سٹاف رپورٹر، نمائندہ خصوصی، خصوصی رپورٹر) وزیر اطلاعات پنجاب عظمیٰ بخاری نے آکھیا اے کہ پنجاب وچ بلدیاتی الیکشن آؤندے دو توں تین مہینیاں دے وچکار متوقع نیں، عوام نوں جلد پٹرول ہور سستا ہون دی خوشخبری ملن والی اے، حکومت عوام نوں ودھ توں ودھ ریلیف دین لئی عملی قدم چُک رہی اے۔ اوہناں نے کمالیہ دے نیڑے تڑے دے قصبے خورشید آباد وچ محرم الحرام لئی سکیورٹی دے پربندھ چیک کرن توں بعد میڈیا نال گل بات کردیاں آکھیا کہ سیاسی کارکن بلدیاتی الیکشن دی تیاری شروع کرن تے نچلی پدھر (سطح) تے جمہوری عمل نوں مضبوط بناؤن وچ اپنا کردار ادا کرن۔
محرم الحرام دے پربندھاں دے بارے وچ عظمیٰ بخاری نے آکھیا کہ پنجاب حکومت عزاداراں نوں بہترین سہولتاں تے سکیورٹی دین لئی بھرپور اقدامات کر رہی اے۔ عظمیٰ بخاری نے مشیر وزیراعلیٰ پنجاب ذیشان ملک دے ہمراہ فیصل آباد ڈویژن دے وکھو وکھ ضلعیاں دا دورہ کیتا تے محرم الحرام بالخصوص عاشورہ دے موقعے تے مجالس، جلوساں تے اوہناں دے روٹاں تے کیتے جان والے پربندھاں دا تفصیلی جائزہ لیا۔
دورے دے دوران عظمیٰ بخاری نے فیصل آباد سٹی، ٹوبہ ٹیک سنگھ، کمالیہ تے پیرمحل وچ وکھ وکھ امام بارگاہواں، مجالس تے جلوساں دیاں تھانواں دا معائنہ کیتا۔ اوہناں نے مجالس دے منتظمین تے عزاداراں نال ملاقات کیتی تے اوہناں توں پربندھاں، سہولتاں تے ہور انتظامی معاملیاں دے بارے پچھیا۔ عظمیٰ بخاری نے کمالیہ وچ قدیمی امام بارگاہ دا وی دورہ کیتا تے اوتھے جاری پربندھاں دا جائزہ لیا۔ اوہناں نے مجلس وچ شریک سوانیاں (خواتین) نال وی ملاقات تے گل بات کیتی۔
