“رینجرز کیمپ پر حملہ: افغان شہریوں کے ملوث ہونے پر پاکستان کا کابل سے شدید احتجاج”
اسلام آباد: پاکستان نے کراچی وچ ہون والے دہشت گرد حملے وچ افغان شہریاں دے ملوث ہون دے ثبوت ساہمنے آؤن توں بعد افغان طالبان حکومت نال سخت احتجاج کردیاں ہویاں منگ کیتی اے کہ افغان دھرتی نوں پاکستان دے خلاف دہشت گردی لئی استعمال ہون توں روکیا جاوے۔
دفترِ خارجہ دے ترجمان نے کراچی دہشت گرد حملے توں بعد افغان طالبان حکومت نوں دتے گئے احتجاجی مراسلے (ڈیمارش) دے بارے میڈیا دے سوالاں دے جواب وچ دسیا کہ لنگھی رات افغانستان دے ناظم الامور نوں دفترِ خارجہ سد کے کراچی حملے تے شدید احتجاج ریکارڈ کروایا گیا۔
ترجمان دفترِ خارجہ دے مطابق ایسے طرحاں دا احتجاجی مراسلہ افغانستان وچ پاکستان دے سفیر عبید الرحمٰن نظامانی نے وی افغان وزارتِ خارجہ دے افسراں دے حوالے کیتا۔
دفترِ خارجہ دے ترجمان دا کہنا اے کہ اے احتجاجی مراسلے ایس سچائی نوں ویکھدیاں ہویاں جاری کیتے گئے نے کہ کراچی دہشت گرد حملے وچ افغان شہری شامل سن، جنہاں وچوں اک حملہ آور نوں جیوندا گرفتار وی کیتا گیا۔
ترجمان نے آکھیا کہ ایس واقعے توں اک واری پھر ثابت ہو گیا اے کہ افغان دھرتی تے افغان شہریاں نوں پاکستان دے اندر دہشت گرد حملیاں دی سازش تے اوہناں تے عمل کرن لئی استعمال کیتا جا رہیا اے۔
ترجمان دے مطابق دہشت گردی دے اے واقعے ثابت کردے نے کہ بارڈر پار افغان دھرتی توں حملے کیتے جا رہے نے، تے افغان شہری لگاتار پاکستان دے اندر دہشت گرد حملیاں دی منصوبہ بندی تے اوہناں نوں پورا کرن لئی استعمال ہو رہے نے۔
