یکم جولائی توں ملک بھر وچ مون سون بارشاں دی پیشگوئی، لینڈ سلائیڈنگ تے اربن فلڈنگ دا خدشہ
کراچی: محکمہ موسمیات نے ملک بھر وچ جولائی دے پہلے ہفتے دے دوران مون سون بارشاں دی پیشگوئی کردیاں ہویاں وکھو وکھ علاقیاں وچ آندھی، گرج چمک، اربن فلڈنگ تے لینڈ سلائیڈنگ توں خبردار کیتا اے۔
محکمہ موسمیات دے مطابق 30 جون دی شام یا رات توں مغربی ہواواں دا سلسلہ ملک وچ داخل ہون دا امکان اے، بحیرہ عرب توں مرطوب (نمی والیاں) ہواواں ملک دے مشرقی تے وسطی علاقیاں وچ داخل ہو رہیاں نیں جدکہ 2 جولائی توں خلیج بنگال توں بھی مرطوب ہواواں ملک دے بالائی علاقیاں دا رخ کرن گیاں۔
محکمہ موسمیات دی پیشگوئی دے مطابق یکم توں 6 جولائی دے دوران کشمیر، پنجاب، خیبرپختونخوا، گلگت بلتستان تے اسلام آباد سمیت وکھو وکھ علاقیاں وچ آندھی تے گرج چمک دے نال بارش متوقع اے۔
محکمہ موسمیات نے دَسیا کہ 3 تے 4 جولائی نوں سندھ دے شہراں سکھر، جیکب آباد، لاڑکانہ تے نال لگدے ضلعیاں جدکہ یکم توں 4 جولائی دے دوران بلوچستان دے شمالی تے شمال مشرقی ضلعیاں وچ وی بارش دا امکان اے۔
محکمہ موسمیات نے خبردار کیتا اے کہ 2 توں 6 جولائی دے دوران بالائی خیبرپختونخوا، گلگت بلتستان، مری، گلیات تے کشمیر وچ لینڈ سلائیڈنگ دا خدشہ اے جدکہ یکم توں 4 جولائی تک اسلام آباد، راولپنڈی، پشاور، گوجرانوالہ، لاہور تے فیصل آباد وچ اربن فلڈنگ دا خطرہ وی موجود اے۔
