ملک وچ دہشتگردی دے واقعات توں بعد پاکستان دی افغان صوبے پکتیا، پکتیکا تے کنڑ وچ کارروائی، 25 دہشتگرد ہلاک
ملک وچ دہشت گردی دے حالیہ واقعات توں بعد پاکستان نے افغان صوبے پکتیا، پکتیکا تے کنڑ وچ کارروائی کردیاں ہویاں 25 دہشتگرد ہلاک کر دتے۔
وفاقی وزیر اطلاعات عطا تارڑ نے ایکس (ٹوئٹر) اُتے بیان جاری کردیاں ہویاں دَسیا اے کہ سرحدی علاقے وچ جماعت الاحرار تے فتنۃ الخوارج دے ٹھکانےآں (کمین گاہواں) اُتے کارروائیاں کیتیاں گئیاں۔
عطا تارڑ نے دَسیا کہ سکیورٹی فورسز نے پاک افغان سرحد اُتے انٹیلی جنس آپریشن کردیاں ہویاں مجموعی طور اُتے فتنۃ الخوارج دے 29 کارندے ہلاک کر دتے۔
وفاقی وزیر اطلاعات عطا تارڑ نے آکھیا کہ 28 جون نوں سکیورٹی فورسز نے باجوڑ وچ آپریشن کیتا، آپریشن وچ خارجی کمانڈر خان فروش عرف زابل 3 دہشت گرداں سمیت ہلاک ہو گیا۔
عطا تارڑ نے دَسیا کہ ہلاک دہشت گرداں دا تعلق بھارتی پراکسی جماعت الاحرار نال سی۔
وفاقی وزیر اطلاعات عطا تارڑ دے مطابق افغان صوبے پکتیا، پکتیکا تے کنڑ وچ وی کارروائی کیتی گئی جس وچ 25 دہشت گرد مارے گئے، دہشت گرداں دے مرکزاں وچ جمع کیتا گیا بھاری تعداد وچ اسلحہ تے گولا بارود وی تباہ ہو گیا۔
عطا تارڑ نے آکھیا کہ آپریشن عزمِ استحکام دے تحت دہشت گرداں تے فتنۃ الخوارج دے خلاف پاکستانی سکیورٹی فورسز دے آپریشن جاری نیں۔
اوہناں نے آکھیا کہ آپریشن اودوں تیکر جاری رہن گے جدوں تک غیر ملکی پیسے تے حمایت نال پاکستان وچ دہشت گردی دیاں وارداتاں بند نہیں ہو جاندیاں۔
