ایران توں تیل تے گیس خریدیں گے، اجے کجھ رکاوٹاں نیں: رانا تنویر
کالا شاہ کاکو، مریدکے، لاہور (نامہ نگار، این این آئی، مانیٹرنگ ڈیسک) وفاقی وزیر برائے قومی غذائی تحفظ تے تحقیق رانا تنویر حسین نے آکھیا اے کہ آزاد کشمیر وچ بدامنی دے پچھے بھارتی فنڈنگ دے ناقابل تردید ثبوت تے شواہد موجود نیں، ریاستی اداریاں نے بھارت دی سازش نوں ناکام بنا دِتا، ایران توں تیل تے گیس خریدیں گے پر اجے کجھ رکاوٹاں نیں۔ ایہناں خیالاں دا اظہار اوہناں نے مریدکے وچ میڈیا نال گفتگو کردیاں کیتا۔
اوہناں آکھیا کہ خیبر پختونخوا دے وزیر اعلیٰ سہیل آفریدی وزیر اعظم شہباز شریف دے متعلق کوئی بات کرن توں پہلے اپنے لیڈر دی رہائی لئی کجھ کرن۔ اسیں سمجھدے آں پی ٹی آئی سیاسی جماعت نہیں، جے پاکستان تحریک انصاف اک حقیقی سیاسی جماعت دے طور تے کردار ادا کرے تے اوہدے نال ہر پدھر (سطح) تے مذاکرات کیتے جا سکدے نیں۔
وفاقی وزیر نے مزید آکھیا کہ ایران توں امریکی پابندیاں تے ہٹ گئیاں نیں پر یورپی یونین سمیت دوجے دیساں ولوں اوہنوں اجے سرٹیفکیٹ نہیں ملیا، جیویں ہی معاملات درست ہوئے تے سب توں پہلے ایران توں پاکستان تیل تے گیس خریدے گا، ایران امریکہ جنگ دے اثرات اٹھ مہینیاں توں دو سال تیکر رہ سکدے نیں، اسرائیل توں چھیتی جان چھوٹ جاوے گی۔
