سندھ طاس اُتے پاکستانی موقف عالمی پدھر اُتے تسلیم، پانی اُتے ہتھ پایا تے کٹ دیاں گے: عطا تارڑ، مصدق ملک
اسلام آباد (نامہ نگا ) وفاقی وزیر اطلاعات و نشریات عطا اللہ تارڑ تے وفاقی وزیر موسمیاتی تبدیلی ڈاکٹر مصدق ملک نے آکھیا اے کہ سندھ طاس معاہدے اُتے پاکستان دا مؤقف عالمی پدھر اُتے تسلیم کیتا گیا اے تے بین الاقوامی برادری نے ایس معاہدے دی قانونی حیثیت نوں تسلیم کردیاں پاکستان دے مؤقف نوں ہور مضبوط کیتا اے۔ اسیں اعلان کر چکے آں جیہڑا پانی اُتے ہتھ پائے گا اوہدا ہتھ کٹ دیاں گے، پاکستان واضح کر چکا اے کہ اپنے حصے دے پانی اُتے کوئی سمجھوتہ نہیں کیتا جائے گا۔ حق تے انصاف لئی ڈٹ جانا پاکستان دی روایت اے تے ملک اپنے قومی مفادات دے تحفظ لئی ہر پدھر اُتے آواز بلند کردا رہے گا۔
اسلام آباد وچ پریس کانفرنس کردیاں وزیر اطلاعات عطا اللہ تارڑ نے آکھیا کہ سندھ طاس معاہدے نوں یکطرفہ طور اُتے معطل نہیں کیتا جا سکدا، کیونکہ ایہ پاکستان تے بھارت دے وچکار طے پاؤن والا اک بین الاقوامی معاہدہ اے، جس دی قانونی حیثیت منّی پرمنّی (مسلمہ) اے۔ عطا اللہ تارڑ نے دسیا کہ پاکستان وچ پہلی واری سندھ طاس معاہدے دے حوالے نال بین الاقوامی سیمینار کروایا جا رہا اے جس وچ دنیا بھر توں پانی دے معاملیاں (آبی وسائل) دے ماہر شریک نیں۔
ایس موقعے اُتے وفاقی وزیر موسمیاتی تبدیلی ڈاکٹر مصدق ملک نے آکھیا اے کہ سندھ طاس معاہدے دے معاملے نوں بین الاقوامی پدھر اُتے بڑے اثر دار (مؤثر) طریقے نال چکیا گیا اے تے پاکستان اپنے حصے دے پانی اُتے کسے قسم دا سمجھوتہ نہیں کرے گا۔ ڈاکٹر مصدق ملک دا کہنا سی کہ پاکستان ماضی وچ تباہ کن ہڑھاں (سیلابوں) دا سامنا کر چکا اے جدکہ ملک دی معیشت تے لکھاں بندیاں دا روزگار کھیتی باڑی (زراعت) نال جڑیا ہویا اے جس دا پورا دارومدار پانی اُتے اے۔ وفاقی وزیر نے آکھیا کہ اسیں اعلان کر چکے آں جیہڑا پانی اُتے ہتھ پائے گا اوہدا ہتھ کٹ دیاں گے، پاکستان واضح کر چکا اے کہ اپنے حصے دے پانی اُتے کوئی سمجھوتہ نہیں کیتا جائے گا۔
