اپوزیشن لیڈر محمود خان اچکزئی دے نال آزاد کشمیر جان والے وفد نوں راولپنڈی کہوٹہ روڈ تے روک دتا گیا

اپوزیشن لیڈر محمود خان اچکزئی دے نال آزاد کشمیر جان والے وفد نوں راولپنڈی کہوٹہ روڈ تے روک دتا گیا۔

اسلام آباد پولیس ولوں روکے جان تے اپوزیشن قیادت نے آزاد پتن شاہراہ تے دھرنا دے دتا۔ محمود خان اچکزئی دے نال وفد وچ اپوزیشن لیڈر سینیٹ علامہ ناصر عباس، سابق وزیراعظم شاہد خاقان عباسی، مصطفیٰ نواز کھوکھر تے مہتاب عباسی شامل سن۔ بعد وچ دھرنا ختم کردیاں پریس کانفرنس وچ محمود خان اچکزئی نے آکھیا کہ ساڈے کول کشمیریاں دا وفد آیا، آکھیا کہ رولیاں دا حل کڈھو، فیصلہ کیتا کہ سچ کہنا اے، جے مطالبات ٹھیک ہوندے تاں حمایت کردے تے جے غلط ہوندے تاں آکھدے ٹھیک نہیں، ساڈی وجہ توں وڈی سڑک نوں بند کیتا، شہری لنگھ نہیں سکے۔ مصطفیٰ نواز کھوکھر نے آکھیا کہ حکومت نے بلدی اگ تے تیل پایا، اسیں رولے حل کرنا چاہندے سی، چاہندے آں کہ کشمیریاں دے شکوے شکایتاں سنیاں جان۔ شاہد خاقان عباسی نے آکھیا کہ کئی وفد آئے کہ کشمیر وچ تناء نوں گھٹ کیتا جائے، اسیں نیک کم لئی جا رہے سی، جانا ضروری سی۔