مریم نواز دا پنجاب وچ 5000 الیکٹرک بساں چلان تے طلبا نوں ای بائیکس دین دا اعلان

لاہور: وزیراعلیٰ پنجاب مریم نواز نے 5 سالاں دے دوران صوبے وچ ہور 5 ہزار الیکٹرک بساں لے کے آؤن دا اعلان کیتا اے۔

وزیراعلٰی پنجاب دی صدارت ہیٹھ ٹرانسپورٹ تے ماس ٹرانزٹ ڈپارٹمنٹ دا اجلاس ہویا جیہدے وچ صوبے وچ ہور الیکٹرک بساں، ای ٹیکسیاں، ای بائیکس تے ای تھری وہیلرز لے کے آؤن دا فیصلہ کیتا گیا۔

اجلاس وچ مریم نواز نے آکھیا کہ اگلے پنج سالاں دے دوران 5 ہزار الیکٹرک بساں پنجاب دے عوام دی خدمت لئی سڑکاں تے ہون گئیاں، پنجاب وچ صرف الیکٹرک بساں ہی نہیں لیائیاں جا رہیاں بلکہ اوہناں دی مینوفیکچرنگ انڈسٹری وی لائی جا رہی اے۔

اجلاس نوں بریفنگ وچ دَسیا گیا کہ پنجاب وچ الیکٹرک بساں دا اسمبلنگ پلانٹ کم شروع کر چکیا اے۔

بریفنگ وچ دَسیا گیا کہ اک سال دے دوران پڙھاکوآں (طلبہ) نوں اک لاکھ ای بائیکس دتیاں جان گئیاں، جبکہ پنجاب حکومت ہر ای بائیک تے 70 ہزار روپے دی چھاٹ (سبسڈی) دیوے گی۔

اجلاس نوں دَسیا گیا کہ کڑیاں (طالبات) دیاں ای بائیکس دی ڈاؤن پیمنٹ تے رجسٹریشن فیس وزیراعلٰی آپ دین گئیاں جبکہ پنجاب دے سرکاری ملازم وی سوکھیاں قسطاں تے ای بائیکس لے سکن گے۔

ایس موقعے تے وزیراعلٰی مریم نواز نے اجلاس وچ تعمیراتی کم دے دوران بچاء دے پربندھاں (حفاظتی اقدامات) نوں پکا کرن دی ہدایت وی کیتی۔