جعلی دوائیاں نال لوگ مر رہے نے، زندگیاں نال کھیڈن دا لائسنس نہیں دتا جا سکدا: جسٹس ملک شہزاد احمد

جے ملزم بے قصور نے تے ڈریپ نے مقدمہ کیوں بنایا؟: ریمارکس، پکے ثبوت پیش کرو: جسٹس جمال مندوخیل، ملزماں دی عبوری ضمانت وچ اگلی سماعت تیکر وادھا، مقدمے دا پورا ریکارڈ طلب، کیس چھیتی مقرر کرن دی ہدایت

اسلام آباد (کورٹ رپورٹر) سپریم کورٹ نے جعلی دوائیاں بنان تے باہرلے ملک بھیجن دے الزام وچ نامزد ملزماں دی گرفتاری توں پہلاں دیاں ضمانتاں وچ اگلی سماعت تیکر وادھا کردیاں ہویاں ایف آئی اے توں مقدمے دا پورا ریکارڈ طلب کر لیا اے تے ڈریپ دے وکیل نوں ملزماں دے خلاف پکے ثبوت پیش کرن دی ہدایت کیتی اے۔ جسٹس جمال خان مندوخیل، جسٹس ملک شہزاد احمد خان تے جسٹس عقیل احمد عباسی اُتے مشتمل بینچ نے سماعت کیتی۔ ڈریپ دے وکیل نے آکھیا کہ ملزم جعلی دوائیاں تیار کر کے باہرلے ملک بھیج رہے سن، اقوام متحدہ نے بھی ایہناں دوائیاں دے بارے وچ رپورٹ جاری کیتی سی۔

جسٹس ملک شہزاد احمد خان نے ریمارکس دتے کہ جعلی دوائیاں دی وجہ توں ہر دیہاڑے لوگ جان توں ہتھ دھو بہندے نے، کسے نوں ایہ لائسنس نہیں دتا جا سکدا کہ اوہ جعلی دوائیاں بنا کے لوکاں دیاں زندگیاں خطرے وچ پاوے۔ ملزماں دے وکیل نے آکھیا کہ اوہناں دے موکلاں دا کمپنی نال کوئی تعلق نہیں۔ جسٹس عقیل احمد عباسی نے ریمارکس دتے کہ گلی کوچے وچ فارماسیوٹیکل کمپنی نہیں چل سکدی، دوائیاں دی تیاری کوئی مانجھی (چارپائی) بنانا نہیں جیہڑی بغیر اجازت شروع کر دتی جاوے۔

جسٹس جمال خان مندوخیل نے ڈریپ دے وکیل نوں آکھیا کہ ملزماں دے خلاف پکے ثبوت عدالت دے ساہمنے پیش کیتے جان۔ جسٹس ملک شہزاد نے ریمارکس دتے کہ جے ملزم بے قصور نے تے دسو ڈریپ نے اوہناں دے خلاف مقدمہ کیوں بنایا؟ عدالت نے ضیا خالد سمیت تن ملزماں دی عبوری ضمانت وچ اگلی سماعت تیکر وادھا کردیاں ہویاں ایف آئی اے توں مقدمے دا پورا ریکارڈ طلب کر لیا تے ہدایت کیتی کہ کیس چھیتی سماعت لئی مقرر کیتا جاوے۔