کسٹمز انٹیلی جنس دی وڈی کاروائی، 9کروڑ توں ودھ مالیت دا سامان ضبط

کراچی: کسٹمز انٹیلی جنس نے وڈی کاروائی کردیاں 9کروڑ توں ودھ مالیت دا ممنوعہ بھارتی گٹکا، ایرانی ٹائلز تے سمگلڈ گڈیاں ضبط کر لئیاں۔ ڈائریکٹوریٹ کسٹمز انٹیلی جنس اینڈ انوسٹی گیشن نے پاکستان رینجرز دے نال سانجھی کاروائی دے دوران 9کروڑ روپے توں ودھ مالیت دا سمگل ہون والے بھارتی ممنوعہ گٹکا، ایرانی ٹائلز تے گڈیاں ضبط کرکے ملزمان دے خلاف مقدمہ درج کر لیا اے۔ ذرائع نے دسیا ڈائریکٹر کسٹمز انٹیلی جنس ڈاکٹر صادق خان نوں اک خفیہ اطلاع ملی کہ بھارتی ممنوعہ گٹکے دی اک بھاری مقدار لہور توں کراچی منتقل کرن لئی میرپور خاص وچ قائم اک گودام وچ رکھیا گیا اے جہدے تے مذکورہ چھاپہ مار ٹیم نے پاکستان رینجرز دے نال سانجھی کاروائی کردیاں گودام تے چھاپہ مار کے 7کروڑ 94لکھ 83ہزار مالیت دے بھارتی گٹکے دے 50ہزار پیکٹ ضبط کرکے ملزمان دے خلاف مقدمہ درج کر لیا اے۔ایس توں علاوہ ڈائریکٹوریٹ نے دو ہور کاروائیاں وچ 26لکھ روپے مالیت دی دو سمگل شدہ گڈیاں تے اک کروڑ 25لکھ 81ہزار مالیت دے ایرانی ٹائلز دے علاوہ سمگلنگ وچ استعمال ہون والا ٹرالر وی ضبط کر لیا اے۔