پاکستان نے افغانستان وچ دہشت گرداں کیلاف کاروائی توں متعلق بھارتی بیان مسترد کر دتا
اسلام آباد: پاکستان نے افغانستان وچ دہشت گرداں دے خلاف کاروائی توں متعلق بھارتی بیان نوں من گھڑت قرار دے کے مسترد کر دتا
ترجمان دفترِ خارجہ طاہر اندرابی دا کہنا اے کہ بھارتی وزارتِ خارجہ دا بیان بے بنیاد تے حقائق دے خلاف اے، افغانستان وچ پاکستان ولوں ہوون والیاں کاروائیاں اُتے بھارت دا بیان مسترد کردے آں، پاکستان نے افغانستان وچ دہشت گرداں دے بنیادی ڈھانچے (انفراسٹرکچر) دے خلاف اپنی جائز کاروائیاں کیتیاں۔
اوہناں نے آکھیا کہ بھارت غیر قانونی طور اُتے مقبوضہ جموں و کشمیر وچ کشمیری عوام دے حقِ خودارادیت نوں مسلسل دبان وچ مصروف اے، جبکہ افغان سرزمین توں پاکستان دے خلاف سرگرم دہشت گرد گروہاں دی سرپرستی وی کر رہیا اے، بھارت افغانستان دی سرزمین پاکستان دے خلاف استعمال کردا اے۔
دفترِ خارجہ دا کہنا سی کہ بھارت اقوامِ متحدہ دی سلامتی کونسل دیاں پابندیاں دی خلاف ورزی کردے ہوئے خطے وچ امن تے استحکام نوں نقصان پہنچان والے ملک دا کردار ادا کر رہیا اے، ایس لئی اوہدے بے بنیاد الزاماں تے اشتعال انگیز بیاناں نوں عالمی پدھر (سطح) اُتے کوئی اہمیت نہیں دتی جانی چاہیدی۔
طاہر اندرابی نے آکھیا کہ اک ملک جو گوانڈھی (ہمسایہ) ممالک دے اندرونی معاملات وچ مداخلت کردا ہووے، اوہدے ولوں اجیہا بیان آنا مضحکہ خیز اے۔
ترجمان ولوں ایس عزم نوں دہرایا گیا کہ پاکستان اپنے شہریاں دی سلامتی تے تحفظ نوں یقینی بنان لئی بین الاقوامی قوانین دے تحت ہر ممکن تے ضروری قدم چکدا رہے گا۔
