“صدقے جاواں۔ ہائے۔ ماں دے بچے! میں تے پڑھن گھلیا (بھیجیا) سی۔”
جنازہ اُٹھدے ہی ماں ٹیوشن سینٹر ول بھجی تے جندرے نوں چمن لگ پئی؛ بالاں دے بستے تے کاپیاں ہجے وی ملبے ہیٹھ دبے سن
لاہور (نیوز ایجنسیاں، مانیٹرنگ سیل)
صوبائی دارالحکومت لاہور دا علاقہ کاہنہ بدھ دے دیہاڑے ماتم کدہ بن گیا، جتھے لنگھی رات اک نجی ٹیوشن سینٹر دی چھت ڈگن دے دل ہلاؤن والے حادثے وچ جاں بحق ہون والے 14 بالاں دے جنازے چکے گئے۔ تنگ گلیاں وچوں لنگھدے ہوئے جنازیاں دے ایس منظر نے پورے علاقے نوں ہلا کے رکھ دتا، جتھے سوگواراں نے نِمسیاں اکھاں (نم آنکھوں) نال اپنے جگر گوشیاں دیاں میتاں چارپائیاں اُتے چک کے مقامی قبرستان پہنچائیاں۔ ایس بھیانک حادثے نے ملک دے دوجے وڈے شہر لاہور نوں شدید غم تے غصے دی لہر وچ لپیٹ دتا اے۔ کچی آبادی دے واسی اپنے پیاریاں دیاں تازہ پٹیاں ہوئیاں قبراں اُتے ہنجو بہاؤندے تے اک دوجے نوں دلاسے دیندے نظر آئے۔ سانحے دا شکار ہون والے بالاں دی عمر 4 توں 12 سالاں دے وچکار سی، جنہاں وچوں کئی ٹبر ایسے نیں جنہاں دے اک توں ودھ بال ایس قیامت وچ لقمہ اجل بن گئے۔ 48 سالہ مقامی رہائشی آس محمد نے انتہائی غمزدہ لہجے وچ آکھیا: “پڑھائی دے دوران اچانک چھت ڈگن نال ماواں دیاں جھولیاں اجڑ گئیاں۔”
کدویں عمارت تے کساناں دی مجبوری
علاقے دے لوکاں دا کہنا اے کہ اوہ جاندے سن کہ نجی ٹیوشن سینٹر دی عمارت انتہائی خستہ حال تے بوسیدہ سی، پر غربت تے علاقے وچ دوجے تعلیمی وسائل نہ ہون پاروں اوہ اپنے بالاں نوں اوتھے گھلن (بھیجن) اُتے مجبور سن۔ حادثے وچ اپنی دھی کھو دین والے 30 سالہ محمد فاروق نے روندے ہوئے دَسیا:
“سبھ نوں پتہ سی کہ ایس عمارت دی حالت بہت خراب اے، پر ساڈے کول ایہدے توں علاوہ کوئی دوجا راہ ہی نہیں سی، اسیں اپنے بالاں دے چنگے مستقبل لئی مجبور ساں۔”
علاقے وچ عورتاں دو بالاں دی میت نوں اک ہی پلنگ اُتے رکھے بیٹھیون سن۔ سوانیاں نے دَسیا کہ ایہ اک ہی گھر دے دو بچے نیں۔ اک دی عمر ست سال اے تے دوجے دی پنج سال۔ اوہناں دی ماں روندے ہوئے کہہ رہی سی: “صدقے جاواں۔۔۔ ہائے ۔۔۔ ماں دے بچے ۔۔۔ میں تے پڑھن گھلیا سی۔”
پنج سالہ ارحم دی ماں کدے روندی تے کدے اسمان ول انگلی چک کے خاموشی نال بچے دی میت ول دیکھدی رہندی۔ کدے اوہ ہتھ والی پکھی نال اپنے بچے دی میت نوں ہوا دیندی۔ کچھ دیر لنگھی تے لوک جنازہ چکن آ گئے۔ ایس ماں نے چارپائی نوں زور نال پھڑ لیا تے چیخ چیخ کے کہندی رہی کہ “میرے بچے نوں نہ لے کے جاؤ۔” جیویں ہی جنازہ اُٹھیا تاں اوہ ٹیوشن سینٹر دے بوہے ول روندے ہوئے بھجی تے دروازے اُتے لگے جندرے (تالے) نوں چمن لگ پئی۔
تباہی دا منظر تے عوام دے سوال
مقامی مسجد وچ سینکڑوں سوگواراں دی موجودگی وچ بالاں دی نمازِ جنازہ پڑھائی گئی۔ جائے وقوعہ اُتے بکھریاں ہوئیاں اٹاں، مڑے ہوئے لوہے دے گارڈرز تے اکھڑیا ہویا کنکریٹ خوفناک منظر دی گواہی دے رہے سن۔ ملبے دے ڈھیر وچ بالاں دے بستے، کاپیاں تے دوجا سامان ہن وی ادھا دبیا ہویا نظر آ رہا اے، جیہنوں دیکھ کے اوتھے موجود ہر بندے دی ہچکی بجھ گئی۔
53 سالہ محمد انور نے ‘اے ایف پی’ نوں دَسیا کہ ایہ ناقابلِ تصور سانحہ اے۔ صرف اوہ ٹبر نہیں جنہاں نے اپنے بال کھوئے نیں، بلکہ پورا علاقہ ایس صدمے نال مفلوج ہو کے رہ گیا اے۔ لوک سوال چُک رہے نیں کہ اک مخدوش عمارت وچ نجی تعلیمی ادارہ چلاون دی اجازت کس نے دتی؟ مقامی لوکاں نے حکومت توں منگ کیتی اے کہ وہ ایس حادثے نوں اک ‘ویک اپ کال’ سمجھے تے سارے سکولاں تے تعلیمی اداریاں دیاں عمارتاں دی پڑتال کروائے۔
