“مہاجرین دیاں نشستاں دا خاتمہ کوئی شکوہ یا گلہ نہیں، جائز مطالبہ اے: وزیراعظم آزاد کشمیر”
بحث لئی اسمبلی سبھ توں موزوں تھاں، سیاسی حق لینی دا سبھ توں چنگا طریقہ سیاسی جدوجہد اے، احتجاج یا ہنگامہ آرائی نہیں: فیصل راٹھور
12 نشستاں فوراً ختم نہیں ہو سکدیاں، جے کوئی رائے یا فارمولا اے تے شیئر نہیں کیتا گیا، ن لیگ نال گل ہوئی تے ردعمل دیاں گے: طارق فضل
اسلام آباد (مانیٹرنگ ڈیسک)
وزیراعظم آزاد کشمیر فیصل ممتاز راٹھور دا کہنا اے کہ مہاجرین دیاں نشستاں دا معاملہ اک بامعنی بحث منگدا اے، مہاجرین دیاں نشستاں دے خاتمے اُتے بحث لئی سبھ توں موزوں تھاں قانون ساز اسمبلی اے۔ اک بیان وچ اوہناں دا کہنا سی کہ سیاسی حق حاصل کرن دا سبھ توں چنگا طریقہ سیاسی جدوجہد اے، احتجاج یا ہنگامہ آرائی نہیں، جتھوں تیکر مہاجرین دیاں نشستاں دا تعلق اے تے اوہناں دی موجودہ حیثیت قبول کرن جوگی نہیں اے۔ فیصل ممتاز راٹھور نے آکھیا کہ مہاجرین دیاں نشستاں دا خاتمہ کوئی شکوہ یا گلہ نہیں بلکہ اک جائز مطالبہ اے۔
دوجے پاسے وفاقی وزیر برائے پارلیمانی امور طارق فضل چودھری نے وزیراعظم آزاد کشمیر دے بیان اُتے ردعمل دیندیاں آکھیا اے کہ فیصل ممتاز راٹھور نے جے کوئی رائے دتی اے یا کوئی فارمولا اے تے اوہ ساڈے نال شیئر نہیں کیتا گیا، سوشل میڈیا دیاں خبراں اُتے اسیں اپنی رائے نہیں دے سکدے۔ وزیراعظم آزاد کشمیر مسلم لیگ ن نال کوئی گل کرن گے تے اسیں اپنا ردعمل دیاں گے۔
اوہناں آکھیا کہ ساڈا مؤقف اے کہ 12 نشستاں فوراً ختم نہیں ہو سکدیاں، ایہناں دے خاتمے لئی آئینی ترمیم دی لوڑ اے۔ الیکشن توں بعد نویں اسمبلی کوئی فیصلہ کرے تے اوہ ترمیم کر سکدی اے، 12 نشستاں ہجے بحال نیں تے بحال رہن گیاں۔
