سزا وچ وادھے لئی آئینی ترمیم دی لوڑ، اج کل ایہہ کہڑا مشکل اے: سپریم کورٹ

صدر دے آئینی اختیار توں بعد سزا وچ وادھا نہیں ہو سکدا: ریمارکس، عمر قید سزائے موت وچ تبدیل کرن دی اپیل خارج تہاڈے علاقے وچ تقریباً ہر بندے کول اسلحہ اے، تلاشی لوو تے 70 فیصد وکلا توں وی برآمد ہو سکدا اے: وکیل نال غیر رسمی مکالمہ

اسلام آباد (کورٹ رپورٹر) صدرِ مملکت دے آئینی اختیار توں بعد سزا وچ وادھا نہیں ہو سکدا، سپریم کورٹ نے عمر قید نوں سزائے موت وچ تبدیل کرن دی اپیل خارج کر دتی۔ سپریم کورٹ نے قرار دتا کہ آئین صدر نوں سزا وچ کمی یا معافی دین دا اختیار دیندا اے تے جے ایہہ اختیار استعمال ہو چکا ہووے تاں سزا وچ وادھے لئی ٹھوس قنونی بنیاد دی لوڑ ہوندی اے۔ تعزیراتِ پاکستان دی دفعہ 302 دے تحت اک سزا پوری ہون توں بعد دوجی کیویں دتی جا سکدی اے؟ جے وادھا ممکن بنانا مقصود اے تاں ایس لئی آئینی ترمیم دی لوڑ ہووے گی تے ریمارکس دتے کہ ویسے وی اج کل ترامیم کرنا کہڑا مشکل کم اے۔

عدالت نے وکیل نال غیر رسمی مکالمے وچ آکھیا کہ تہاڈا تعلق جس علاقے توں اے اوتھے تاں تقریباً ہر بندے کول اسلحہ ہوندا اے۔ جے تلاشی لئی جائے تاں ستر فیصد وکلا توں وی اسلحہ برآمد ہو سکدا اے۔ جسٹس جمال خان مندوخیل دی سربراہی وچ تن رکنی بینچ نے سماعت کیتی، عدالت نے ملزم تحرین الیاس دی عمر قید سزائے موت وچ تبدیل کرن دی اپیل ایس بنیاد تے خارج کر دتی کہ ملزم سزا پوری کرن توں بعد رہا ہو چکا اے۔ ژوب بلوچستان دے جیل سپرنٹنڈنٹ ویڈیو لنک تے پیش ہوئے۔

دوجے پاسے، سپریم کورٹ دے جسٹس محمد علی مظہر، جسٹس عقیل احمد عباسی تے جسٹس محمد شفیع صدیقی تے مشتمل تن رکنی بینچ نے سندھ سروس ٹریبونل دے فیصلے دے خلاف دائر دو سول اپیلاں تے محفوظ فیصلہ جاری کر دتا تے سندھ سروس ٹریبونل دا فیصلہ برقرار رکھدے ہوئے قرار دتا کہ کنٹریکٹ بنیاداں تے کیتی گئی ملازمت پروموشن (ترقی) لئی مطلوبہ مدتِ ملازمت وچ شمار نہیں کیتی جا سکدی۔ سندھ سول سرونٹس ایکٹ 1973 تے متعلقہ قواعد دے تحت کنٹریکٹ ملازم “سول سرونٹ” دی تعریف توں باہر اے، کنٹریکٹ سروس نوں ریگولر سرکاری ملازمت دے برابر نہیں سمجھیا جا سکدا۔ کنٹریکٹ ملازمت مخصوص مدت تے شرطاں دے تحت ہوندی اے، ایس توں مستقل تقرری یا ریگولرائزیشن دا حق پیدا نہیں ہوندا۔ سینارٹی تے پروموشن دا تعین ریگولر تقرری دی تریخ توں ہوندا اے تے کنٹریکٹ دی مدت ایس مقصد لئی شامل نہیں کیتی جا سکدی۔