آزاد کشمیر دے ہر ضلعے وچ انتخابی مہم چلاواں گا: بلاول

اسلام آباد ط چیئرمین پاکستان پیپلز پارٹی بلاول بھٹو زرداری نے آکھیا اے کہ آزاد کشمیر دے ہر ضلعے وچ انتخابی مہم چلاواں گا، اوہ پیپلز پارٹی آزاد کشمیر دے صدر چودھری انوار الحق تے جنرل سیکرٹری فیصل ممتاز راٹھور نال گفتگو کر رہے سن۔ ملاقات دے دوران آزاد کشمیر دے الیکشناں تے انتخابی مہم دی تیاریاں تے تبادلۂ خیال کیتا گیا، پیپلز پارٹی آزاد جموں و کشمیر دی قیادت نے بلاول بھٹو زرداری نوں انتخابی مہم دی تیاریاں دے حوالے توں بریفنگ دتی۔

ایس موقعے تے بلاول نے آکھیا کہ آزاد جموں و کشمیر دے لوک اوہناں دے دل دے قریب نیں تے اوہ انتخابی مہم دے سلسلے وچ ہر ضلعے دا دورہ کرن گے۔ اوہناں نے آکھیا کہ مسئلہ کشمیر تے ہی پاکستان پیپلز پارٹی دی بنیاد رکھی گئی سی تے اوہناں نے عالمی پدھر (سطح) تے کشمیر دا مقدمہ بھرپور انداز وچ اٹھایا اے۔

چیئرمین پیپلز پارٹی نے آکھیا کہ کشمیری عوام دے مسلیاں دے حل لئی پاکستان پیپلز پارٹی اوہناں دے نال کھڑی اے۔ اوہناں نے پارٹی رہنماواں نوں ہدایت کیتی کہ انتخابی مہم دے دوران عوام نال رابطیاں دا عمل مزید تیز کیتا جائے تے پاکستان پیپلز پارٹی دا منشور گھر گھر پہنچایا جائے۔