وزیراعظم نال کروشین وزیر خارجہ دی ملاقات، باہمی تعاون نوں ودھاؤن تے اتفاق
اسلام آباد: وزیرِاعظم محمد شہباز شریف نال جمہوریہ کروشیا دے وزیر برائے خارجہ تے یورپی امور ڈاکٹر گورڈن گرلیچ راڈمان نے ملاقات کیتی تے آپسی تعاون نوں ودھاؤن دی خواہش دا اظہار کیتا۔
وزیرِاعظم ہاؤس وچ ملاقات دے دوران نائب وزیرِاعظم تے وزیرِ خارجہ سینیٹر محمد اسحاق ڈار تے سیکرٹری خارجہ آمنہ بلوچ وی موجود سن۔
وزیرِاعظم شہباز شریف نے کروشیا دے وزیرِ خارجہ تے اوہناں دے وفد نوں پاکستان آؤن تے جی آیاں نوں آکھیا تے کہیا کہ پاکستان تے کروشیا دے وچکار دوستانہ تعلقات آپسی احترام، خیرسگالی تے سانجھے مفادات تے مبنی نیں۔
وزیرِاعظم نے تجارت تے سرمایہ کاری، انفارمیشن ٹیکنالوجی، روابط، زراعت، سیاحت تے ہنرمند افرادی قوت سمیت وکھو وکھ شعبیاں وچ دوطرفہ تعاون نوں ہور ودھاؤن دی پاکستان دی خواہش دا اظہار کیتا۔
وزیرِاعظم نے کروشیا دے صدر زوران میلانوویچ تے وزیرِاعظم آندرے پلینکوویچ لئی نیک تمناواں دا اظہار کردیاں ہوئیاں پاکستان دے سرکاری دورے دی پُرخلوص دعوت دتی۔
کروشیا دے وزیرِ خارجہ نے پرتپاک استقبال تے وزیرِاعظم دا شکریہ ادا کردیاں ہوئیاں کہیا کہ اسلام آباد دا دورہ اوہناں لئی باعثِ اعزاز اے۔
کروشین وزیرِ خارجہ نے علاقائی امن دیاں کوششاں وچ پاکستان تے اوہدی قیادت دے نمایاں کردار نوں سلاہیا تے آپسی دلچسپی دے سارے شعبیاں وچ پاکستان تے کروشیا دے تعلقات نوں ہور وسعت دین دی اپنی حکومت دی خواہش دا اظہار کیتا۔
