بلوچستان وچ طاقت دا استعمال چھڈ کے مذاکرات کیتے جان: اے پی سی

اسلام آباد (مانیٹرنگ ڈیسک)

تحریکِ انصاف دے پربندھ ہیٹھ بلوچستان دے معاملے تے آل پارٹیز کانفرنس (اے پی سی) ہوئی، جس وچ ساریاں سیاسی جماعتاں نے بلوچستان وچ طاقت دا استعمال چھڈ کے گل بات راہیں مسئلے حل کرن، لاپتہ بندیاں دی بازیابی، صاف شفاف الیکشن تے مقامی لوکاں وچ وسائل دی ونڈ دے مطالبات پیش کیتے۔ آل پارٹیز کانفرنس خیبر پختونخوا ہاؤس اسلام آباد وچ ہوئی، جس دی صدارت اختر خان مینگل نے کیتی۔ کانفرنس وچ قومی اسمبلی وچ اپوزیشن لیڈر محمود خان اچکزئی سمیت بلوچستان دی نمائندگی کرن والیاں سیاسی جماعتاں دے رہنماواں اختر خان مینگل، شاہد خاقان عباسی، اسد قیصر، مصطفیٰ نواز کھوکھر، محسن داوڑ تے دوجیاں نے شرکت کیتی۔

چیئرمین پی ٹی آئی بیرسٹر گوہر نے کہیا کہ “جتن دے باوجود ساڈے کول بلوچستان وچ سیٹاں نہیں نیں، اسیں بلوچستان وچ دہشت گردی دی مذمت کردے آں، دہشت گردی دے ایجنڈے تے سبھ نوں اکٹھے ہونا پئے گا، بلوچستان نوں محفوظ بنانا پاکستان نوں محفوظ بنانا اے۔” محمود خان اچکزئی نے کہیا کہ ناانصافی نال نفرت بڑھدی اے تے اِسے پاروں گل دہشت گردی تک پہنچدی اے، ایتھے احتجاج کرن والیاں نال گل بات نہیں کیتی جاندی۔ شاہد خاقان عباسی نے کہیا کہ جبر مسئلے دا حل نہیں، سانوں گل بات کرنی پئے گی، اوتھوں دے لوکاں دی گل سننی پئے گی، زیارت دا واقعہ کوئی عام واقعہ نہیں اے۔

اعلامیے دے مطابق اے پی سی نے بلوچستان وچ انسانی حقوق دیاں خلاف ورزیاں تے بدامنی تے ڈونگھی تشویش دا اظہار کردیاں ہوئیاں کہیا کہ بلوچستان وچ غیر نمائندہ حکومت تے پالیسیاں اِیس بحران دی وجہ نیں۔ بلوچستان دے مسئلے دے حل لئی ‘ٹروتھ اینڈ ریکنسیلی ایشن کمیشن’ بنایا جائے، تے بلوچستان وچ ساریاں سیاسی جماعتاں تے سٹیک ہولڈرز دے وچکار مذاکرات کیتے جان۔