“نئے بجٹ سے معاشی اشاریوں میں نمایاں بہتری آئی، وزیر خزانہ”
گھٹ مہنگائی، ودھدے زرمبادلہ دے ذخائر پاروں معاشی استحکام ہویا: اورنگزیب، وفد نال گل بات؛ ریگولیٹرز کاروباری آسانیاں دے نال نال قانون دا موثر نفاذ یقینی بناؤن، اجلاس توں خطاب
اسلام آباد: وفاقی وزیر خزانہ محمد اورنگزیب نے آکھیا اے کہ نویں مالی سال دے بجٹ پاروں پاکستان دے معاشی بنیادی اشاریاں وچ نمایاں بہتری آئی اے تے مالیاتی پائیداری ہور مضبوط ہوئی اے۔ ایس اینڈ پی گلوبل ریٹنگز دے وفد نال ملاقات دے دوران وزیر خزانہ دا کہنا سی کہ معاشی اصلاحات تے موثر معاشی پالیسیاں پاروں پاکستان دی اقتصادی کارکردگی لگاتار بہتر ہو رہی اے۔ گھٹ مہنگائی، ودھدے زرمبادلہ دے ذخائر، مضبوط بیرونی شعبے تے سرمایہ کاراں دے اعتماد وچ وادھے پاروں معاشی استحکام ہویا اے۔
وزیر خزانہ نے آکھیا کہ گھٹ مالیاتی خسارے، ریکارڈ پرائمری سرپلس تے بہتر قرضیاں دے انتظام پاروں مالیاتی پائیداری ہور مضبوط ہوئی اے۔ اس توں اڈ اک اجلاس دی صدارت کردیاں سینیٹر محمد اورنگزیب نے آکھیا کہ ریگولیٹری اداریاں نوں کاروبار تے سرمایہ کاری وچ آسانیاں دین دے نال نال مارکیٹ وچ شفاف، منصفانہ تے سازگار کاروباری ماحول نوں یقینی بناؤن لئی متعلقہ قوانین دے موثر نفاذ نوں وی یقینی بنانا ضروری اے، سرمایہ کاری نوں وڈھاؤن، کاروباری ترقی تے مارکیٹ دے اعتماد نوں مضبوط کرن لئی کاروبار دوست ریگولیٹری فریم ورک بہت زیادہ ضروری اے۔
