خاتون نوں ہراساں کرن دا الزام ثابت ہون تے نجی کمپنی دے 5 عہدیداراں تے 27 لکھ روپے جرمانہ عائد
اسلام آباد: وفاقی محتسب برائے انسداد ہراسیت نے خاتون نوں دفتر توں باہر ملاقات دی دعوت دین، ہتھ چھون، سی سی ٹی وی ریکارڈ محفوظ نہ بنان سمیت وکھو وکھ طریقیاں نال ہراساں کرن دا الزام ثابت ہون تے نجی کمپنی دے 5 عہدیداراں تے 27 لکھ روپے جرمانہ لا دتا۔
وفاقی محتسب برائے انسدادِ ہراسگی نے اک مقدمے دا فیصلہ سناندیاں واضح کیتا اے کہ کم دی تھاں تے ہراسگی تے انتقامی رویہ ناقابلِ برداشت اے تے ایہدے سخت نتیجے ساہمنے آؤن گے۔
شکایت کرن والی خاتون نے وفاقی محتسب برائے انسدادِ ہراسگی نوں دَسیا کہ وکھو وکھ عہدیاں تے فائز بندیاں نے اوہدے نال نامناسب رویہ اپنایا۔ اک ملزم نے میٹنگ دے دوران ذاتی تے غیر پیشہ ورانہ جُملے آکھے، دفتر توں باہر ملاقات دی دعوت دتی تے پروڈکٹ سیمپل وکھاندیاں اوہدا ہتھ پھڑیا۔
شکایت کرن والی خاتون دے مطابق دوجے ملزم نے اوہدے نجی میسجاں دیاں تصویراں لئیاں تے ٹیم دے ساہمنے بے عزتی والے جُملے آکھے۔ تیجے ملزم نے شکایت نوں اگے ودھن توں روکیا تے اوہ سی سی ٹی وی ریکارڈ محفوظ نہ کر سکیا جیہڑا اوہنے آپ ویکھیا سی۔
شکایت کرن والی خاتون نے دَسیا کہ چوتھے ملزم نے انتقامی کارروائی دی ہدایت دتی تے ادارے وچ قانونی تقاضیاں دے مطابق کمیٹی قائم نہ کیتی۔ پنجویں ملزم نے شکایت کرن والی نوں قانونی نوٹس توں بعد دھمکی والی فون کال کیتی۔
شکایت کرن والی نے آکھیا کہ لگاتار دشمنی تے دباؤ پاروں اوہنوں نوکری چھڈنی پئی تے بعد وچ اوہدے کاغذات تے واجبات روک لئے گئے۔
سماعت دے دوران ملزمان نے الزامات توں انکار کیتا تے خاتون دی شخصیت، لباس تے نجی زندگی نوں موضوع بنایا۔
وفاقی محتسب نے ملزمان دیاں دلیلاں رد کردیاں آکھیا کہ شکایت کرن والی دی شخصیت، لباس یا سماجی رویہ مقدمے دا حصہ نہیں ہوندا۔ شواہد، گواہواں دے بیاناں تے ملزمان دے بیاناں وچ تضاد توں ہراسگی تے انتقامی کارروائی ثابت ہوئی اے۔
وفاقی محتسب دے مطابق نہ خوش اخلاقی رضامندی ہوندی اے، نہ شکایت وچ لیٹ ہون نال مقدمہ کمزور ہوندا اے۔ عورتاں نوں کم دی تھاں تے محفوظ تے عزت والا ماحول دینا مالک دی ذمے واری اے۔ ہراسگی یا انتقامی رویہ سزا جوگ جرم اے۔
وفاقی محتسب نے خاتون ملازمہ دی ہراسگی دے کیس وچ نجی ادارے دے پنج ملزمان نوں 27 لکھ روپے جرمانے دی سزا سنا دتی۔
عدالت نے نجی ادارے نوں 30 دناں وچ انسدادِ ہراسگی کمیٹی نوں نویں سرے توں بنان دی ہدایت وی کیتی۔
