افغانستان وچ موجود دہشتگرد تنظیماں پاکستان دی سلامتی لئی لگاتار خطرہ نیں: اسحاق ڈار
اسلام آباد: نائب وزیر اعظم اسحاق ڈار نے آکھیا اے کہ افغانستان وچ موجود دہشتگرد تنظیماں پاکستان دی سلامتی لئی لگاتار خطرہ نیں۔
کروشیا دے وزیرِ خارجہ نال سانجھی پریس کانفرنس دے دوران اسحاق ڈار نے آکھیا کہ کروشیا دے وزیرِ خارجہ تے اوہناں دے وفد نوں پاکستان آون تے جی آیاں نوں آکھدے نیں، کروشیا دے وزیرِ خارجہ دا دورہ دو پاسے تعلقات نوں ودھان وچ اہم سنگِ میل اے۔
اوہناں نے آکھیا کہ پاکستان تے کروشیا وچالے خیرسگالی تے باہمی اعتماد دے مضبوط تعلقات موجود نیں، کروشیا پاکستان دیاں سرمایہ کار دوست پالیسیاں توں فائدہ چکن۔
نائب وزیرِ اعظم دا کہنا سی کہ عالمی برادری نوں دہشتگردی دے خاتمے لئی سانجھیاں کوششاں تیز کرنا ہون گیاں جد کہ افغانستان وچ موجود دہشتگرد تنظیماں پاکستان دی سلامتی لئی لگاتار خطرہ نیں، ایہ کسے وی ملک خصوصاً پاکستان دے خلاف استعمال نہیں ہونیاں چاہیدیاں۔
اوہناں نے ہور آکھیا کہ بھارت ولوں سندھ طاس معاہدے دی اک پاسے معطلی تے پانی نوں بطور ہتھیار استعمال کرنا بین الاقوامی قانوناں تے معاہدیاں دی خلاف ورزی اے۔
اسحاق ڈار دا کہنا سی کہ اسلام آباد مفاہمتی یادداشت خطے وچ امن نوں ودھان لئی اہم پیش رفت اے۔
ایس موقعے تے گل بات کردیاں کروشیئن وزیرِ خارجہ نے آکھیا کہ میرا دورۂ پاکستان دو پاسے تعلقات نوں ہور مضبوط بنان وچ اہم کردار ادا کرے گا، پاکستان تے کروشیا دے تعلقات باہمی احترام تے اعتماد دی بنیاد تے بنے ہوئے نیں۔
