“مجسٹریٹس غریب بندے لئی بوہے (دروازے) کھلے رکھن: گورنر”
ججز دی کامیابی دا دارومدار صرف انصاف تے کیتے گئے فیسلیاں تے ہوندا اے، حق دا ساتھ دیو، فیسلیاں وچ دیری نہیں ہونی چاہیدی: نویں چنے گئے مجسٹریٹس نال ملاقات وچ گل بات
لاہور: گورنر پنجاب سلیم حیدر خان نے آکھیا اے کہ سائلین (انصاف منگن والیاں) نوں ویلے سر انصاف دوان وچ ججز دا کردار بہت اہم اے۔ دیر نال انصاف ملنا نا انصافی اے، پیپلز پارٹی نے عدلیہ تے ججز دی بحالی لئی وڈیاں قربانیاں دتیاں۔ دو سالاں وچ سخی (مخیر) بندیاں دی مدد نال ارباں روپے دے ترقیاتی کم کروائے۔ اوہناں نے ایہناں گلاں دا اظہار گورنر ہاؤس وچ پنجاب جوڈیشل اکیڈمی دے ہیٹھ نویں چنے گئے جوڈیشل مجسٹریٹس دے وفد نال ملاقات وچ کیتا۔
گورنر نے نویں چنے گئے جوڈیشل مجسٹریٹس نوں ودھائی دتی تے آکھیا کہ غریب سائلین دیاں مجسٹریٹس تے ججز توں وڈیاں عاصاں (امیداں) جڑیاں ہوندیاں نیں۔ دیر نال انصاف ملنا انصاف نہ دین دے برابر اے۔ مجسٹریٹس اپنے بوہے (دروازے) غریب بندے لئی کھلے رکھن۔ مقدمیاں دے فیسلیاں وچ دیری نہیں ہونی چاہیدی۔ بنا کسے دباؤ دے حق سچ دا ساتھ دینا اسلام دا سبق اے۔ ججز دی کامیابی دا دارومدار صرف انصاف تے کیتے گئے فیسلیاں تے ہوندا اے۔ جج اپنے فیسلیاں نال اپنا مقام بناوندے نیں۔ رب دی مخلوق لئی اسانیاں پیدا کرنی چاہیدیاں نیں۔ بطور گورنر صوبائی محتسب دے فیسلیاں راہیں غریب سائلین نوں ویلے سر انصاف دوان وچ کوئی کسر نہیں چھڈ رہا۔ گورنر نے آکھیا کہ پنجاب حکومت دی ناجائز قَبضیاں بارے قانون سازی دی میں سلاہنا (تعریف) کردا ہاں۔
