پاک بحریہ نے اورماڑہ دے نیڑے ڈوبن والی کارگو کشتی دے 20 پاکستانی عملے دے ممبراں نوں ریسکیو کر لیا۔
پاک بحریہ نے میری ٹائم سکیورٹی ایجنسی نال ویلے سر تے سانجھی ہنگامی کارروائی کردیاں اورماڑہ دے چڑھدے پاسے ڈوبن والے کارگو جہاز توں 20 پاکستانی عملے دے ممبراں نوں بحفاظت ریسکیو کر لیا۔
آئی ایس پی آر دے مطابق جوائنٹ میری ٹائم انفارمیشن کوآرڈینیشن سینٹر وچ ملن والی ہنگامی اطلاع تے کارروائی کیتی گئی، پی این ایس حنین تے ضروری فضائی وسائل نوں فوری کارروائی لئی روانہ کیتا گیا۔
آئی ایس پی آر دے مطابق ریسکیو اہلکاراں دی پیشہ ورانہ مہارت پاروں متاثرہ جہاز وچ سوار سارے 20 بندیاں نوں بچا لیا گیا۔
آئی ایس پی آر دا کہنا اے کہ ریسکیو کیتے گئے سارے بندیاں نوں ضروری طبی امداد دتی جا رہی اے۔
آئی ایس پی آر دے مطابق کامیاب آپریشن پاک بحریہ تے میری ٹائم ایجنسی دے انسانی جاناں نوں بچان دے عزم دا ثبوت اے، ایہ آپریشن ہر ویلے سمندری ہنگامی حالات نال نمٹن دی مکمل تیاری دا مظہر اے۔
