خیبرپختونخوا: منظور کیتا گیا استحقاق ترمیمی ایکٹ واپس لیا جاوے: ن لیگ

مراعاتی قانون مضحکہ خیز، وی آئی پی کلچر نوں ہلاشیری، ارکان نوں سیاسی رشوت دتی گئی: طلال چوہدری

آزادیٔ صحافت تے حملہ، ایہہ میڈیا اداروں نوں کوریج توں ڈکن دی کوشش اے: اختیار ولی

اسلام آباد، پشاور (مانیٹرنگ ڈیسک، ایجنسیاں)

وزیرِ مملکت داخلہ طلال چوہدری تے مسلم لیگ (ن) خیبرپختونخوا دے صدر اختیار ولی نے خیبر پختونخوا اسمبلی توں پاس ہون والے استحقاق ترمیمی ایکٹ نوں سخت تنقید دا نشانہ بنایا اے۔ اوہناں نے ایس قانون نوں متنازعہ، غیر جمہوری تے آزادیٔ صحافت تے حملہ قرار دیندیاں ہویاں ایہنوں فوراً واپس لین دا مطالبہ کیتا اے۔

طلال چوہدری نے آکھیا کہ خیبرپختونخوا اسمبلی دا مراعاتی بل مضحکہ خیز اے تے پی ٹی آئی نے اپنے ارکان نوں سیاسی رشوت دین لئی ایہہ قانون سازی کیتی اے۔ اوہناں دا کہنا سی کہ وی آئی پی کلچر مکاؤن دے دعوے کرن والیاں نے اپنے لئی اچیچیاں (غیر معمولی) مراعات منظور کر لیاں نیں، جنہاں وچ ارکان تے اوہناں دیاں لغائیاں (اہلیہ) لئی تاحیات بلیو پاسپورٹ، ٹول ٹیکس توں چھٹی (استثنٰی)، سرکاری ریسٹ ہاؤسز وچ مفت رہائش تے ممنوعہ بور دے اسلحہ لائسنس سمیت وکھو وکھ سہولتاں شامل نیں۔ ماضی وچ کسے وی اسمبلی نے ایہوجہی قانون سازی نہیں کیتی، پی ٹی آئی دی عملی سیاست اوہناں دے نعریاں دے بالکل الٹ اے۔

دوجے پاسے پشاور وچ پریس کانفرنس کردیاں ہویاں مسلم لیگ (ن) خیبرپختونخوا دے صدر اختیار ولی نے استحقاق ترمیمی ایکٹ نوں آزادیٔ صحافت، عوام دے حقِ معلومات تے جمہوری قدراں تے حملہ قرار دتا۔ اوہناں آکھیا کہ ایس قانون راہیں اسمبلی دی کارروائی دی رپورٹنگ نوں سرکاری اجازت نال جوڑن تے صحافیاں تے میڈیا اداریاں نوں کوریج توں ڈکن (روکن) دی کوشش کیتی جا رہی اے۔ اوہناں مطالبہ کیتا کہ ایس متنازعہ قانون نوں فوراً واپس لیا جاوے۔

اختیار ولی نے صوبائی حکومت تے تعلیم، صحت، امن وامان تے گورننس وچ فیل ہون دا الزام وی لایا۔ اوہناں دا کہنا سی کہ صوبے دیاں یونیورسٹیاں مالی تے انتظامی بحران دا شکار نیں، صحت دیاں سہولتاں ماڑیاں ہو چکیاں نیں، جدکہ دہشت گردی، غیر قانونی مائننگ (کان کنی)، منشیات، کرپشن تے ترقیاتی فنڈز وچ گھپلیوں دے سنگین الزام ساہمنیں آ رہے نیں، جنہاں دی صاف شفاف انکوائری ہونی چاہیدی اے۔