طلاق اُتے شوہر دی ادھی جائداد بیوی نوں دتی جاوے: سینیٹ کمیٹی وِچ علی ظفر دی تجویز
مجوزہ بل نوں اسلامی نظریاتی کونسل گھلیا جاوے تاں جے اسلامی تعلیمات دی روشنی وِچ اِہدا جائزہ لیا جا سکے، سینیٹر عطا الرحمن
سینیٹ دی مذہبی امور کمیٹی نے حج دے موقعے اُتے شکایتاں دا جائزہ لین لئی ڈی جی حج تے ہور حکام نوں اگلے اجلاس وِچ سد لیا
اسلام آباد: سینیٹ دی قائمہ کمیٹی برائے مذہبی امور دا اجلاس کمیٹی دے چیئرمین سینیٹر عطا الرحمن دی صدارت وِچ پارلیمنٹ ہاؤس وِچ ہویا۔ سینیٹر سید علی ظفر نے اِک نجی بل اُتے بریفنگ دیندیاں آکھیا کہ کئی عورتاں نے شکایت کیتی اے کہ طلاق توں بعد اوہناں کول نہ تے رہائش بچدی اے تے نہ ہی گزر بسر دا کوئی ذریعہ ہوندا اے۔ اوہناں نے تجویز دتی کہ نکاح نامے وِچ اِک شق شامل کیتی جاوے جس دے تحت طلاق دی صورت وِچ شوہر دی جائداد وِچ بیوی دا 50 فیصد حصہ مقرر کیتا جا سکے، بیوی دیاں گھریلو خدمتاں، بالاں دی پرورش تے شوہر دی مدد نوں قانونی طور اُتے منیا جانا چاہیدا اے۔ اوہناں نے ہور دسیا کہ اِس معاملے اُتے عدالتی سطح اُتے وی غور کیتا گیا، جہاں جسٹس منصور علی شاہ تے جسٹس کیانی سنے وکھو وکھ قانونی ماہراں نے اِس مؤقف دا اظہار کیتا کہ شادی شدہ زندگی دے دوران بیوی دیاں خدمتاں نوں وی معاشی شراکت سمجھیا جانا چاہیدا اے۔
سینیٹر بشریٰ انجم بٹ نے آکھیا کہ جے بیوی معاشی طور اُتے مضبوط ہووے تے شوہر دی مدد کرے تاں ایسے حالات وِچ شوہر دے حقاں دا وی تحفظ ہونا چاہیدا اے۔ کمیٹی دے چیئرمین نے رائے دتی کہ مجوزہ بل نوں اسلامی نظریاتی کونسل گھلیا جاوے ۔سینیٹر حافظ عبدالکریم نے آکھیا کہ مغربی نظریت نوں پاکستان وِچ لاگو کرن دی کوشش نہیں ہونی چاہیدی، اسلام وِچ عورتاں نوں عزت، احترام تے پورے حقوق حاصل نیں تے اِسے نظام نوں مضبوط بنان دی لوڑ اے۔ اوہناں دا کہنا سی کہ اوہ اِس مجوزہ بل دی موجودہ شکل وِچ حمایت نہیں کردے۔ سینیٹر سرمد علی نے آکھیا کہ جے ترکی تے ایران جیہے اسلامی ملکاں وِچ اِس طرح دے قانون موجود نیں تاں اوہناں نوں قرآن و سنت دے الٹ قرار دینا ٹھیک نہیں ہووے گا۔ چیئرمین کمیٹی نے آکھیا کہ پاکستان وِچ کوئی بھی قانون قرآن و سنت دے متصادم (الٹ) نہیں بنایا جا سکدا، اِسے لئی اسلامی نظریاتی کونسل دی رائے لینا ضروری اے۔
وفاقی وزیر برائے مذہبی امور سردار محمد یوسف نے آکھیا کہ بہتر ہووے گا کہ اِس بل نوں دوبارہ کونسل نوں گھلیا جاوے ۔سینیٹر دنیش کمار نے آکھیا کہ ہندو پرسنل لا وِچ اِس طرح دی گنجائش موجود اے تے اوہ اِس بل دی حمایت کردے نیں ۔ کمیٹی نے لمبی بحث توں بعد فیصلہ کیتا کہ مجوزہ بل اسلامی نظریاتی کونسل نوں گھلیا جاوے یا کونسل دے نمائندیاں نوں اگلے اجلاس وِچ سد کے اوہناں دی رائے لئی جاوے تاں جے اوہدی روشنی وِچ اگلی قانون سازی کیتی جا سکے۔
وزارت مذہبی امور دے حکام نے حج 2026 دے انتظاماں اُتے بریفنگ دیندیاں دسیا کہ بینکنگ سروسز دے بارے وِچ 3164، آن لائن درخواست سروسز دیاں 2552، رہائش دیاں 1527، حاجی کیمپ سروسز دیاں 1242، ٹرانسپورٹ دیاں 1010 تے خوراک دے بارے وِچ 714 شکایتاں ملیاں جنہاں دا ویلے سِر ازالہ کیتا گیا۔
چیئرمین کمیٹی نے حج انتظاماں اُتے ناخوشی دا اظہار کردیاں آکھیا کہ اوہ ذاتی خرچے اُتے حج دے دوران سعودی عرب گئے، پر متعلقہ حکام نے میرے نال کوئی رابطہ کیتا تے نہ ہی کوئی مناسب تعاون کیتا۔ سینیٹر حافظ عبدالکریم نے وی کئی حاجیاں دیاں شکایتاں دا حوالہ دتا۔ سینیٹر دنیش کمار نے حج مشن دے کجھ انتظامی معاملیاں اُتے سخت تحفظات دا اظہار کردیاں آکھیا کہ متعلقہ افسراں، خاص طور اُتے ڈی جی عبد الوہاب سومرو نوں کمیٹی دے سامنے سدیا جاوے۔ وزیر مملکت برائے مذہبی امور کھیل داس کوہستانی نے یقین دوائی کہ جے کمیٹی لکھتی طور اُتے شکایتاں دیوے تاں ذمہ دار افسراں دے خلاف کارروائی کیتی جائے گی۔ کمیٹی نے فیصلہ کیتا کہ متعلقہ افسراں دی کارکردگی دا پورا جائزہ لین لئی اگلے اجلاس وِچ متعلقہ حکام نوں سدیا جائے گا جبکہ ڈی جی حج عبد الوہاب سومرو سنے ذمہ دار افسراں توں وی وضاحت منگی جائے گی۔ کمیٹی دا اگلا اجلاس 29 جولائی نوں ہووے گا۔
