پنجاب حکومت تے امریکہ دا ثقافتی تعاون ودھان اُتے اتفاق

امریکی قونصل جنرل سٹیٹسن سینڈرز دی وزیر اطلاعات عظمیٰ بخاری نال ملاقات؛ الحمرا آرٹس کونسل تے امریکی فنکاراں وِچ سانجھی پارٹنرشپ اُتے وی گل بات

لاہور: وزارتِ اطلاعات و ثقافت پنجاب تے امریکن قونصلیٹ لاہور دا کلچر دے شعبے وِچ تعاون ودھان اُتے اتفاق ہویا اے۔ وزیر اطلاعات پنجاب عظمیٰ بخاری نال امریکی قونصل جنرل لاہور سٹیٹسن سینڈرز نے لنگھے دن ملاقات کیتی۔ امریکی قونصل جنرل نے پنجاب فلم سٹی دے بنن تے پنجاب وِچ تھیٹر نوں دوبارہ جیوندا (ریوائیول) کرن لئی کیتے گئے کماں دی سلاہنا کیتی؛ اِس موقعے اُتے لاہور وِچ امریکی فنکاراں تے الحمرا آرٹس کونسل دے وچکار سانجھی پارٹنرشپ قائم کرن اُتے وی وچار وٹاندرا کیتا گیا۔

عظمیٰ بخاری نے امریکی قونصل جنرل نوں وزیراعلیٰ پنجاب مریم نواز دے کیتے گئے کماں بارے دَسیا۔ وزیر اطلاعات پنجاب عظمیٰ بخاری نے آکھیا کہ پنجاب وِچ سوانیاں (خواتین)، پڑھاکوآں (طلبہ) تے کساناں لئی تریخی کم کیتے جا رہے نیں، پنجاب وِچ “اپنی چھت اپنا گھر” پروگرام دے تحت اِک لکھ 70 ہزار گھر بن رہے نیں۔ ملاقات وِچ وزارتِ اطلاعات و ثقافت پنجاب تے امریکی قونصلیٹ لاہور دے وچکار ثقافت، فن تے تخلیقی کماں دے شعبے وِچ آپسی تعاون نوں ہور ودھان اُتے وی اتفاق کیتا گیا۔ ملاقات دے مُکنے اُتے صوبائی وزیر اطلاعات و ثقافت عظمیٰ بخاری نے امریکی قونصل جنرل سٹیٹسن سینڈرز نوں یادگاری سووینئر پیش کیتا۔