پاکستان نال وفاداری دی شرط (شق) ختم کرن دا مطالبہ قبول نہیں: امیر مقام
پاکستان نال وفاداری دی شرط (شق) ختم کرن دا مطالبہ قبول نہیں؛ “پاکستان ہمیشہ زندہ باد” محض اِک نعرہ نہیں بلکہ ساڈے عزم دی علامت اے: امیر مقام
مظفرآباد: وفاقی وزیر برائے امورِ کشمیر و گلگت بلتستان امیر مقام نے آکھیا اے کہ “پاکستان ہمیشہ زندہ باد” محض اِک نعرہ نہیں اے، بلکہ ایہہ قومی اتحاد، امن، استحکام تے ترقی دے عزم دی علامت اے۔ کوہالہ توں مظفرآباد تک کڈھی گئی ریلی وِچ عوام دے سمندر نے ایہہ ثابت کر دِتا اے کہ آزاد کشمیر دے لوک پاکستان نال اپنی لازوال محبت تے وفاداری اُتے ہمیشہ پکے رہن گے۔ اوہناں نے اِنہاں خیالاں دا اظہار کوہالہ توں راڑہ مظفرآباد تک “پاکستان ہمیشہ زندہ باد” ریلی توں خطاب کردیاں کیتا۔ امیر مقام نے آکھیا کہ کشمیریاں نے ہر مشکل ویلے وِچ پاکستان نال اپنی محبت، وفاداری تے یکجہتی دا عملی ثبوت دِتا اے جِس اُتے پوری قوم نوں مان اے۔ سپاہی مقبول حسین نے سخت تشدد دے باوجود پاکستان دے خلاف نعرہ مارن توں انکار کیتا سی۔
وفاقی وزیر نے آکھیا کہ آزاد کشمیر دی ترقی تے عوامی فلاح حکومت دی پہلی ترجیح اے؛ آزاد کشمیر نوں آٹے تے بجلی اُتے دِتی جان والی سبسڈی انجے ای جاری رہے گی۔ حکومت نے مذاکرات دے بوہے ہمیشہ کھلے رکھے پر کالعدم ایکشن کمیٹی دے کجھ ذمہ داراں نے مذاکرات دے دوران پاکستان نال وفاداری بارے شق نوں ختم کرن دا مطالبہ کیتا، جِس نوں کسے وی حالے قبول نہیں کیتا جا سکدا۔ اِس جلسے وِچ صدر مسلم لیگ (ن) آزاد کشمیر شاہ غلام قادر، کیپٹن (ر) صفدر، مرتضیٰ جاوید عباسی، محسن شاہنواز رانجھا، سینیٹر سعود چودھری، احمد نواز، عاصم شیر، نورین عارف تے ثاقب مجید راجہ سمیت مقامی آگوآں نے شرکت کیتی۔
