مینارِ پاکستان جلسہ، پیپلز پارٹی طاقت دا بھرپور مظاہرہ کرے گی: گورنر پنجاب
کشمیر الیکشن وِچ وی بھاری اکثریت نال جِت کے حکومت بناواں گے؛ فیصل میر دی اگوائی وِچ کارکناں دی گورنر پنجاب سردار سلیم حیدر نال ملاقات، اپنے مسلیاں توں دَس پایا
لاہور: گورنر پنجاب سردار سلیم حیدر خان نے آکھیا اے کہ 25 جولائی نوں مینارِ پاکستان لاہور دے جلسے وِچ پاکستان پیپلز پارٹی اپنی طاقت دا بھرپور وکھالا (مظاہرہ) کرے گی۔ پیپلز پارٹی لاہور سمیت پورے پنجاب وِچ اپنی طاقت مُڑ حاصل کر چُکی اے، آؤن والے الیکشن وِچ حیران کُن نتیجے دیوے گی تے انشاء اللہ کشمیر دے الیکشن وِچ وی بھاری اکثریت نال جِت کے اپنی حکومت بنائے گی۔ اوہناں نے اِنہاں خیالاں دا اظہار گورنر ہاؤس وِچ پیپلز پارٹی دے کارکناں نال خطاب کردیاں کیتا۔
اِس توں پہلاں، گورنر پنجاب نال پیپلز پارٹی لاہور دے صدر فیصل میر دی اگوائی (قیادت) وِچ کارکناں دی اِک وڈی گنتی نے گورنر ہاؤس وِچ ملاقات کیتی۔ اِس دوران کارکناں نے گورنر پنجاب نوں اپنے مسلے سُنائے جِس اُتے سردار سلیم حیدر خان نے مسلے حل کرن دا بھروسہ دوایا۔ سردار سلیم حیدر خان نے اپنے خطاب وِچ ہور آکھیا کہ لاہور پیپلز پارٹی دے کارکناں دا گھر اے؛ پیپلز پارٹی سمیت ہر جماعت دے سیاسی کارکناں لئی گورنر ہاؤس دے بوہے کُھلے نیں۔ کارکن گلی گلی، محلے محلے وِچ بلاول بھٹو دا سُنیہا (پیغام) اپڑان۔ پیپلز پارٹی اِس ویلے وی جمہوری عمل دا حصہ اے تے جمہوریت دی مضبوطی لئی اپنا کردار ادا کردی رہے گی؛ بلاول بھٹو عوامی مینڈیٹ نال آؤن والے وزیراعظمِ پاکستان ہون گے۔
