فلور ملز تے کنک (گندم) دے تاجریاں لئی سٹاک لمٹ مقرر کرن دا فیصلہ

کراچی (این این آئی) سندھ حکومت نے فلور ملز تے لائسنس یافتہ کنک (گندم) دے تاجریاں لئی سٹاک لمٹ مقرر کرن دا فیصلہ کر لیا اے تاں جے ذخیرہ اندوزی تے نقلی (مصنوعی) تھوڑ دا پکے پیریں خاتمہ کیتا جا سکے۔

ایہہ فیصلہ صوبائی وزیر خوراک مخدوم محبوب الزماں تے صوبائی وزیر قانون و داخلہ ضیا لنجار دی سانجھی صدارت ہیٹھ ہون والے اجلاس وچ کیتا گیا، جس وچ سیکریٹری قانون، سیکریٹری خوراک تے ہور متعلقہ اعلیٰ افسراں نے وی شرکت کیتی۔ اجلاس وچ ہدایت دتی گئی کہ طے کیتی گئی سٹاک لمٹ تے ہر حال وچ عمل کروایا جاوے تے ایہنوں پکا کرن لئی قانونی تے انتظامی قدماں نوں چھتی توں چھتی آخری شکل دتی جاوے۔

صوبائی وزیر خوراک مخدوم محبوب الزماں نے آکھیا کہ ذخیرہ اندوزی تے ناجائز منافع خوری نوں کسے وی حال وچ برداشت نہیں کیتا جاوے گا، جدکہ صوبائی وزیر داخلہ ضیا الحسن لنجار نے آکھیا کہ نقلی تھوڑ پیدا کرن تے منافع خوری وچ ملوث بندیاں دے خلاف بناں کسے فرق دے کارروائی کیتی جاوے گی۔ اجلاس وچ متعلقہ اداریاں نوں چنگی نگرانی تے سخت عملدرآمد دیاں ہدایتاں وی جاری کیتیاں گئیاں۔