حکومتی کارکردگی کمیٹی دا اجلاس، اصلاحاتی تجاویز دا جائزہ
ورکنگ گروپس دیاں سفارشاں تے غور توں بعد اوہناں نوں حتمی شکل دے دتی گئی، کمیٹی دی منظور کیتی گئی سفارشاں ہور غور لئی وزیراعظم نوں پیش کیتیاں جان گیاں
اسلام آباد (وقائع نگار، اے پی پی) حکومتی کارکردگی بہتر بناؤن لئی اصلاحاتی سفارشاں نوں حتمی شکل دے دتی گئی۔ نائب وزیرِ اعظم تے وزیرِ خارجہ سینیٹر محمد اسحاق ڈار دی صدارت ہیٹھ حکومتی کارکردگی وچ بہتری بارے کمیٹی دا اجلاس اسلام آباد وچ ہویا، جس وچ سرکاری نظام نوں ہور موثر تے جدید بناؤن لئی اصلاحاتی تجاویز دا جائزہ لیا گیا۔
جمعے نوں دفترِ خارجہ دے ترجمان ولوں جاری کیتے گئے بیان دے مطابق اجلاس وچ پنج ذیلی ورکنگ گروپس ولوں پیش کیتیاں گئیاں سفارشاں تے تفصیلی غور کیتا گیا تے اوہناں نوں حتمی شکل دے دتی گئی۔
ایہناں تجاویز وچ وفاقی سیکرٹریٹ دی تنظیمِ نو (دوبارہ ترتیب)، ای-آفس نوں جدید فیصلہ سازی دے نظام وچ بدلنا، ایم ایس ونگ وچ اصلاحات، کارکردگی جائزہ رپورٹ دے نظام نوں بہتر بنانا تے سارے حکومتی اداروں دے وچکار مضبوط حکمتِ عملی نوں فروغ دینا شامل اے۔ کمیٹی دیاں منظور کیتیاں گئیاں سفارشاں ہور غور تے منظوری لئی وزیرِ اعظم نوں پیش کیتیاں جان گیاں۔
اجلاس وچ پٹرولیم تے آئی ٹی و ٹیلی کام دے وفاقی وزراء، وزیرِ اعظم دے معاونِ خصوصی طارق باجوہ، کابینہ، اسٹیبلشمنٹ، اقتصادی امور تے ٹیلی کام دے وفاقی سیکرٹریز تے ہور متعلقہ افسراں نے شرکت کیتی۔
