15 جولائی توں 30 اگست: شدید گرمی، تیز بارشاں تے سیلاب دا خدشہ، وفاق تے سندھ حکومت متحرک

موسمیاتی خطرات نال نمٹن لئی وزیراعلیٰ ہاؤس وچ اجلاس، سندھ سب توں ودھ حساس صوبہ، این ڈی ایم اے دی بریفنگ

حفاظتی بنداں دا مسلح افواج دے تعاون نال سروے جاری، این ایچ اے، ریلوے ہائی الرٹ، 24 گھنٹے رابطے دا نظام وی فعال

جان تے مال دے تحفظ لئی تیار رہو: جام خان شورو، موسمیاتی تبدیلی ہن مستقبل دا نہیں موجودہ دور دا خطرہ اے: مصدق ملک

کراچی (سٹاف رپورٹر) وفاقی تے سندھ حکومت نے 15 جولائی توں 30 اگست تک شدید گرمی، تیز بارشاں تے ممکنہ سیلابی صورتحال دے پیشِ نظر ہنگامی تیاریاں نوں حتمی شکل دینا شروع کر دتی اے۔ وزیراعلیٰ ہاؤس وچ ہون والے اعلیٰ سطحی اجلاس وچ سیلاب، شہری علاقیاں وچ بارش دے پانی دے نکاس، ہیٹ ویوز تے ہور موسمیاتی خطرات نال نمٹن دے اقدامات دا جائزہ لیا گیا۔

این ڈی ایم اے نے بریفنگ وچ دسیا کہ سندھ دریائے سندھ دے آخری حصے وچ ہون پاروں سب توں ودھ حساس صوبہ اے تے کشمور، گھوٹکی، سکھر، شکارپور، لاڑکانہ، دادو، جامشورو، قمبر شہدادکوٹ، کراچی، حیدرآباد، بدین، سجاول تے ٹھٹھہ سمیت کئی اضلاع خطرے وچ آ سکدے نے۔ اجلاس نوں دسیا گیا کہ حفاظتی بنداں دا مسلح افواج دے تعاون نال سروے جاری اے جدکہ این ایچ اے، پاکستان ریلوے تے ہور اداریاں نوں ہائی الرٹ کر دتا گیا اے۔ وفاقی تے صوبائی ایمرجنسی آپریشن سینٹرز دے وچکار چوبیس گھنٹے رابطے دا نظام وی فعال کر دتا گیا اے۔

حکام دے مطابق متوقع ایل نینو پاروں خریف دیاں فصلاں، خاص طور تے چاول، کپاس، مکئی تے گنے دی پیداوار متاثر ہون دا خدشہ اے۔ وزیرِ آبپاشی جام خان شورو نے آکھیا کہ سارے متعلقہ اداریاں نوں انسانی جان و مال دے تحفظ لئی ہر ویلے تیار رہن دی ہدایت کیتی گئی اے۔ وفاقی وزیرِ موسمیاتی تبدیلی ڈاکٹر مصدق ملک نے آکھیا کہ موسمیاتی تبدیلی ہن مستقبل نہیں بلکہ حال دا چیلنج اے، جس نال نمٹن لئی قومی سطح تے مضبوط تے سانجھے اقدامات ضروری نے۔ چیف سیکریٹری سندھ آصف حیدر شاہ نے یقین دوایا کہ صوبائی انتظامیہ نے اپنیاں ساریاں تیاریاں مکمل کر لیاں نے تے وفاقی اداریاں نال لگاتار رابطے وچ اے۔