اک بندے دی ضد نے 40 خانداناں نوں بے گھر کر دتا، نسلہ ٹاور متاثرین

5 برس لنگھن دے باوجود معاوضے توں محروم، گھراں دی واپسی یقینی بنائی جائے

کراچی (سٹاف رپورٹر) وفاقی آئینی عدالت ولوں غیر قانونی تعمیرات بارے سپریم کورٹ دے پرانے احکامات واپس لئے جان توں بعد نسلہ ٹاور دے متاثرین نے حکومت توں مطالبہ کیتا اے کہ عمارت نوں اِسے تھاں تے دوبارہ تعمیر کیتا جائے۔ متاثرین دا کہنا اے کہ نسلہ ٹاور نوں ڈھائے جان (مسمار کرن) نوں پنج برس لنگھن دے باوجود اوہ اجے تک معاوضے توں محروم نے تے اوہناں دے گھراں دی واپسی یقینی بنائی جائے۔

نسلہ ٹاور دے رہائشی عبدالقادر نے آکھیا کہ ساریاں متعلقہ این او سیز (NOCs) ہون دے باوجود چالیس خاندان تباہ ہو گئے تے اج تک انصاف دے منتظر نے۔ متاثرین وچ شامل پروفیسر سنتوش نے آکھیا کہ سانحہ گل پلازہ دے متاثرین دی مدد کیتی گئی سی، اِسے طرحاں نسلہ ٹاور دے متاثرین نوں وی ریلیف دتا جائے۔

نسلہ ٹاور وچ چار فلیٹاں دے مالک محمد علی نے آکھیا کہ جے رہائشیاں نوں پہلے معاوضہ دے کے عمارت ڈھان دا فیصلہ کیتا جاندا تے گھٹ توں گھٹ کوئی خاندان بے گھر نہ ہوندا۔ اوہناں سوال چکیا کہ متاثرین دے نقصان دا ہرجانہ کون بھریگا؟ اوہناں دا کہنا سی کہ اک بندے دی ضد نے چالیس خانداناں نوں بے گھر کر دتا۔

متاثرین دا کہنا سی کہ سپریم کورٹ دے پلاٹ ویچ کے معاوضہ دین دے فیصلے تے وی اجے تک عمل نہیں ہویا۔ اوہناں مطالبہ کیتا کہ وفاقی آئینی عدالت دے نویں فیصلے توں بعد حکومت اوہناں نال ہون والی زیادتی دا ازالہ کرے تے نسلہ ٹاور دی اِسے جگہ تے دوبارہ تعمیر یا کوئی ڈھکواں متبادل دے کے ورھیاں توں جاری بے یقینی نوں مکایا جائے