بلوچستان: دہشتگرداں نے دکان وچ بیٹھے 5 مزدور قتل کر دتے

پنجے بندیاں دا تعلق پنجاب توں اے، ذمہ دار بچ نہیں سکدے: صدر، وزیرِ اعظم؛ فورسز دا سانجھا آپریشن ‘شعبان’ جاری، ہور 7 دہشتگرد ہلاک، گنتی 109 ہو گئی

کوئٹہ، اسلام آباد (سٹاف رپورٹر، آئی این پی، اے پی پی، مانیٹرنگ ڈیسک)

بلوچستان دے ضلع واشک وچ فتنہ ہندوستان دے دہشتگرداں نے فائرنگ کر کے پنجاب نال تعلق رکھن والے 5 محنت کش قتل کر دتے نیں۔ دوجے پاسے پاک فوج، فرنٹیئر کور (ایف سی) تے بلوچستان پولیس دا صوبے وچ دہشتگرداں دے خلاف سانجھا (مشترکہ) آپریشن “شعبان” کامیابی نال جاری اے، نویاں کارروائیاں وچ ہور 7 دہشتگرداں نوں ہلاک کر دتا گیا۔

تفصیلات دے مطابق ضلع واشک وچ ایرانی سرحد لاگے علاقے ماشکیل دے بازار وچ ہتھاں وچ اسلحہ لئی بندیاں نے حجام دی دکان اُتے بیٹھے مزدوراں اُتے فائرنگ کر دتی جس نال پنجاب دے رہن والے 5 مزدور حسن، عبدالقدیر، محسن تے بلال وغیرہ دم توڑ گئے۔ ڈپٹی کمشنر واشک مجید سرپرہ دے مطابق واقعے توں بعد حملہ آور نس گئے، پولیس تے سکیورٹی فورسز نے لاشاں نوں ہسپتال منتقل کر دتا تے علاقے نوں گھیرے وچ لے کے ملزماں دی لبھ ٹرپھ (تلاش) شروع کر دتی۔ پولیس دا کہنا اے کہ مقتولین دا تعلق پنجاب دے وکھو وکھ ضلعیاں توں اے، لاشاں چتی (جلدی) اوہناں دے ابائی علاقیاں ول گھلیاں جان گیاں۔ سکیورٹی ذرائع دے مطابق جاں بحق پنجے بندے حجام سن تے مدت توں اوتھے رہ رہے سن۔

ادھر وزیرِ اعلیٰ بلوچستان میر سرفراز بگٹی نے 5 بندیاں دے قتل دی سخت مذمت کردیاں آکھیا اے کہ بے گناہ لوکاں اُتے حملہ کسے اک صوبے یا قومیت اُتے نہیں بلکہ پاکستان دی وحدت، آئین تے ریاست اُتے حملہ اے، جدکہ صدرِ مملکت، وزیرِ اعظم شہباز شریف، وفاقی وزیرِ داخلہ محسن نقوی تے وزیرِ اعلیٰ پنجاب مریم نواز نے ایس المناک واقعے دی سخت مذمت کردیاں شہیداں دے گھروالیاں نال دلی ہمدردی تے تعزیت دا اظہار کیتا اے۔ صدر آصف زرداری نے قیمتی انسانی جاناں دے ضیاع اُتے ڈونگھے دکھ دا اظہار کردیاں مذمتی بیان وچ آکھیا اے کہ معصوم شہریاں تے محنت کش مزدوراں نوں نشانہ بنانا کھلی بربریت اے، دہشتگرداں تے اوہناں دے سہولت کاراں نوں قانون دے کٹہرے وچ لیایا جائے گا۔

وزیرِ اعظم نے آکھیا کہ نہتے مزدوراں نوں نشانہ بنانا سفاکانہ تے بزدلانہ فعل اے، سرکار تے سکیورٹی فورسز ملک توں دہشتگردی دے پورے خاتمے تے ہر شہری دی جان و مال دی حفاظت لئی پکی اے۔ محسن نقوی نے آکھیا کہ حکومت ایس دکھ دی گھڑی وچ متاثرہ ٹبراں دے نال اے تے دہشتگرداں نوں اوہناں دے انجام تک پہنچایا جائے گا۔ وزیرِ اعلیٰ پنجاب نے آکھیا کہ بے گناہ مزدوراں نوں نشانہ بنانا انتہائی بزدلانہ کم اے۔

ادھر ذرائع دے مطابق بلوچستان وچ جاری سانجھے آپریشن شعبان دے دوران سکیورٹی اداریاں نے خفیہ اطلاعات اُتے وکھ وکھ علاقیاں وچ فضائی تے زمینی کارروائیاں کیتیاں۔ پہلی کارروائی وچ 3 دہشتگرد ہلاک کیتے گئے جیڑے وکھو وکھ خرابیاں وچ ملوث سن۔ سران ٹنگی وچ دوجی نویں کارروائی دے دوران ہور 4 دہشتگرد ہلاک کیتے گئے۔ آپریشن شعبان دے مڈھ توں ہن تک ہلاک دہشتگرداں دی گنتی 71 ہو چکی اے جدکہ 5 جولائی توں ہن تک آپریشن شعبان تے ہور اپریشنز وچ کُل ملا کے 109 دہشتگرد مارے جا چکے نیں، ہلاک دہشتگرداں توں اسلحہ تے گولہ بارود بھی برآمد کر لیا گیا اے۔

سکیورٹی ذرائع دے مطابق بلوچستان وچ دہشتگرداں دے پورے خاتمے تک آپریشن شعبان جاری رہے گا تے فورسز ہر قسم دے خطرے نال نمٹن لئی کارروائیاں جاری رکھن گیاں۔ صدر زرداری، وزیرِ اعظم شہباز شریف تے وزیرِ داخلہ محسن نقوی نے بلوچستان وچ جاری آپریشن وچ ہور دہشتگرداں نوں ہلاک کرن اُتے سکیورٹی فورسز دیاں کامیابیاں نوں سراہیا اے۔ محسن نقوی نے آکھیا کہ دہشتگرد عنصراں لئی پاکستان دی دھرتی اُتے کوئی تھاں نہیں، قوم بہادر سکیورٹی فورسز دے مڈھے نال مڈھا لا کے کھڑی اے، دہشتگرداں دے خلاف کارروائیاں پوری طاقت نال جاری رہن گیاں۔