امت دے سانجھے مسئلیاں دا حل اتحاد تے باہمی تعاون وچ اے، فضل الرحمن
پاکستان تے سعودی عرب دے تعلقات ایمان، بھرا بندی (اخوت) تے سانجھے اسلامی مفادات اُتے قائم نیں، پنجاب دے چودھریاں تے نواباں نوں اسیں ہی بھوئیں (زمین) بوس کر سکدے ہاں: تقریباں توں خطاب۔
اسلام آباد، لاہور (دنیا نیوز، سٹاف رپورٹر) جے یو آئی دے سربراہ مولانا فضل الرحمن نے رابطہ عالمِ اسلامی دے زیر اہتمام پاکستانی علما کرام دے مشاورتی اجلاس توں خطاب کردیاں ہویاں آکھیا کہ پاکستان تے سعودی عرب دے تعلقات ایمان، اخوت تے سانجھے اسلامی مفادات اُتے قائم نیں۔ رابطہ عالمِ اسلامی امتِ مسلمہ دے اتحاد، اعتدال تے رواداری دے فروغ وچ اہم کردار ادا کر رہیا اے ۔ امتِ مسلمہ دی وحدت تے استحکام دی ضمانت علماء دے اتحاد وچ اے جبکہ امت دے سانجھے مسئلیاں دا حل اتحاد، اعتدال تے باہمی تعاون وچ لُکیا ہویا اے۔ مولانا فضل الرحمن نے آکھیا کہ علماء امت دا اے اکٹھ خیر، برکت تے وحدتِ امت دا پیغام اے۔ تقریب وچ سعودی عرب دے سفیر نواف بن سعید المالکی، رابطہ عالمِ اسلامی دے سیکرٹری جنرل شیخ ڈاکٹر محمد بن عبدالکریم العیسیٰ، مفتی تقی عثمانی، مولانا حنیف جالندھری تے ہور وڈے علماء کرام نے شرکت کیتی۔ مولانا فضل الرحمن نے خادمِ حرمین شریفین شاہ سلمان بن عبدالعزیز دی صحت، سلامتی تے لمبی عمر لئی وی دعا کیتی۔
سربراہ جے یوآئی مولانا فضل الرحمٰن نے قصور وچ تحفظِ مدارسِ و عوامی حقوق کانفرنس توں خطاب کردیاں ہویاں آکھیا کہ پنجاب دے عوام دی سوچ وچ تبدیلی دی خوشخبری سُنائی دے رہی اے، لگدا اے ہݨ عوام دے تیور بدل چکے نیں۔ اس وطنِ عزیز دی آزادی لئی تہاڈی پِٹھ اُتے دو سو سالہ تاریخ اے، جڈوں ہندوستان نوں انگریز حکومت توں آزادی دوان لئی ساڈے وڈیریاں (اکابرین) نے ایہنوں دارالحرب قرار دے کے جہاد دا مُڈھ بنھیا سی۔
اک صدی تیکر برصغیر وچ علماء لڑدے رہے، بے سر و سامانی دے حال وچ لڑدے رہے، عالمی طاقت دے خلاف لڑدے رہے، اپنی جدوجہد وچ اوہناں نے کوئی کمی نہیں چھڈی۔ آؤن والیاں نسلاں نوں اک پیغام دتا کہ آزادی لئی اپنے سر کٹوائے جا سکدے نیں، آزادی لئی پھانسی (سولی) قبول ہو سکدی اے، پر فرنگی دی غلامی کسی وی قیمت اُتے ساڈے لئی قبول نہیں اے۔
میں پنجاب دے کسان نوں پیغام دینا چاہنا واں، میں پنجاب دے مزدور نوں پیغام دینا چاہنا واں، تسیں بے فکر ہو جاؤ، وڈیریاں دا، چودھریاں دا، سرداراں دا بھوت اپنے سِراں توں لاہ دیو۔ اے لڑائی جمعیت علماء اسلام لڑے گی۔ جے تیرے گریبان وچ کسی طاقتور دا ہتھ پیا، اسیں اس ہتھ نوں بھن کے رکھ دیاں گے۔ تے اسیں پاکستان وچ، اسیں خیبر پختونخوا وچ، اسیں بلوچستان وچ وڈے وڈے خاناں، وڈے وڈے نواباں، جیہڑے خدائی دعوے کردے سی، اوہناں دے دعویاں نوں جے بھوئیں بوس کیتا اے تاں پنجاب دے چودھریاں تے نواباں نوں وی اسیں ہی بھوئیں بوس کر سکدے ہاں۔
پاکستان دے عوام ووٹ پاؤندے نیں، پر عوام دا ووٹ ساہمنے نہیں آؤندا، پتہ نہیں کتھے غائب ہو جاندا اے۔ گلگت وچ الیکشن ہویا، تے اک پولنگ اسٹیشن اُتے، جپھے جمعیت علماء بارے آکھیا جا رہیا سی کہ جِت رہی اے، اوہدے بکسے دریا وچ سٹ دتے گئے۔ ہݨ دسو، دریا وچ بکسے کتھے لبھو گے؟ ووٹ کتھوں گنو گے؟
ہݨ جے اس طرحاں عوام دے حقِ رائے دہی اُتے ڈاکہ ماریا جائے گا، تے پارلیمنٹ عوام دے حق دی لڑائی نہیں لڑے گی، بلکہ مقتدرہ نوں طاقتور بنان دی لڑائی لڑے گی، جیہڑی دھاندلی کراؤندی اے۔
کانفرنس توں جے یو آئی دے مرکزی ڈپٹی جنرل سیکرٹری مولانا محمد امجد خان، مرکزی ترجمان محمد اسلم غوری، مرکزی ناظمِ مالیات مولانا صلاح الدین ایوبی، سابق وفاقی وزیر مولانا اسعد محمود، سینیٹر مولانا عطاء الرحمن، سینیٹر مولانا عبدالواسع، مولانا راشد خالد محمود سومرو تے ہور عہدیداراں نے وی خطاب کیتا۔
