مالیاتی معاملیاں اُتے مہم بے بنیاد تے گمراہ کُن اے: خواجہ آصف
بدنیتی اُتے مبنی جُڑت (منظم) مہم نال سرمایہ کاراں دا بھروسہ ٹُٹیا، ملکی ساکھ خراب ہو سکدی اے، غیر ذمہ دارانہ رپورٹنگ کرن والے بندیاں دے خلاف کارروائی کیتی جائے: وزیرِ دفاع
اسلام آباد (مانیٹرنگ ڈیسک) وزیرِ دفاع خواجہ آصف نے آکھیا اے کہ پاکستان دے اہم مالیاتی معاملیاں نوں بے بنیاد تے گمراہ کُن الزاماں نال بدنام کرن لئی بظاہر اک جُڑت (منظم) تے بدنیتی اُتے مبنی مہم چلائی جا رہی اے۔ ایکس (ٹویٹر) اُتے اپنے بیان وچ اوہناں نے آکھیا کہ اے سارے دعوے پورے طریقے نال بے بنیاد تے جھوٹ اُتے کھڑے نیں۔ پاکستان دے پہلے پانڈا بانڈ تے 750 ملین ڈالر دے یورو بانڈ دا اجرا سارے قانونی تے ضابطے دے تقاضیاں دے مطابق کیتا گیا۔
خواجہ آصف نے آکھیا کہ خودمختار مالیاتی معاملیاں بارے غلط خبراں دی لگاتار چھپائی تے قومی اسمبلی وچ پچھے گئے سوالاں نوں توڑ مروڑ کے پیش کرن دے اثرات صرف عوامی بحث تیکر محدود نہیں رہندے، بلکہ ایہدے نال سرمایہ کاراں دا بھروسہ ٹُٹدا اے، بین الاقوامی مالیاتی منڈیاں (مارکیٹاں) وچ پاکستان دی ساکھ خراب ہندی اے تے اگلیوں ہون والے مالیاتی کماں اُتے پُٹھے (منفی) اثرات پے سکدے نیں۔
اوہناں نے آکھیا کہ اے صحافت نہیں بلکہ سنسنی خیزی، غلط معلومات تے خاص سیاسی مقصداں اُتے مبنی زرد صحافت اے۔ اوہناں دا کہنا سی کہ حکومت نوں لاگو قانوناں دے تحت غیر ذمہ دارانہ تے گمراہ کُن رپورٹنگ وچ پھسے بندیاں دے خلاف کارروائی دے حق دا جائزہ لینا چاہیدا اے۔
وزیرِ دفاع نے ہور آکھیا کہ صحافتی اصولاں دا تقاضا اے کہ خبر نشر یا چھاپن توں پہلے اوہدی پچھ پرتیت (تصدیق) کیتی جائے تے متعلقہ دھر (فریق) دا موقف ضرور لیا جائے۔ اوہناں نے دسیا کہ اوہناں نے وزارتِ خزانہ توں معلومات لئیاں نیں تاں جے پڑھن والیاں دے ساہمنے دوجا موقف تے جوابی دلیل وی پیش کیتی جا سکے۔
