ہتھ پیر مارن اُتے وی پی ٹی آئی نوں سمجھ نہیں آ رہی کہ کیہ کرن: نجم سیٹھی

اسٹیبلشمنٹ گل سُنن اُتے تیار نہیں، پی ٹی آئی بارے پالیسی وچ کوئی لچک ساوہنے نہیں آ رہی، ملک وچ تبدیلی آئی تاں اوہ تحریکِ انصاف نہیں لیائے گی: “آج کی بات سیٹھی کے ساتھ” وچ گفتگو

لاہور (مانیٹرنگ ڈیسک) سینئر تجزیہ کار نجم سیٹھی نے آکھیا اے کہ تحریکِ انصاف والے ہتھ پیر مار رہے نیں پر اوہناں نوں سمجھ نہیں آ رہی کہ وہ کیہ کرن، علیمہ خان کول جیہڑے لوک اکٹھے ہو جاندے نیں اوہ صرف سُنن، دیکھن تے شغل لئی آؤندے نیں تے نعرے وی لا دیندے نیں۔ سوال اے وے کہ جڈوں اس کٹھے ہوئے لوکاں (کراؤڈ) نوں آکھو کہ لانگ مارچ کرو، تاں اے لوک نہیں نکلن گے۔

دنیا نیوز دے پروگرام “آج کی بات سیٹھی کے ساتھ” وچ گفتگو کردیاں ہویاں اوہناں نے ہور آکھیا کہ جڈوں توں عمران خان جیل گئے نیں، پارٹی دے اندر پھوٹ پئی ہوئی اے کہ اصلی لیڈر کون اے تے مہم کون چلائے گا۔ پہلے تاں یہی آہدے سی کہ موروثی سیاست نہیں چلے گی، عمران خان وی ایہدے خلاف سی، اسیں اے وی دیکھیا اے کہ جس لیڈر نوں اوہ نامزد کردے سی اوہ اس معیار اُتے پورا نہیں اتردا۔ عمران خان تاں اے چاہندے نیں کہ احتجاج کرو، لڑائی کرو۔ علی امین گنڈاپور نے کچھ کوشش کیتی پر اوہ بھج گئے، اوہ ریاست دے خلاف نہیں کھڑے ہو سکے۔ اوہدے توں بعد بشریٰ بی بی نے ریاست دے خلاف کھڑے ہون دی کوشش کیتی، اوہناں نوں وی کامیابی نہ ملی۔ ہݨ علیمہ خان احتجاج اُتے لگی ہوئی نیں، اوہناں توں وی کچھ نہیں ہو پا رہیا۔

عمران خان نے جیہڑی لیڈرشپ نامزد کیتی اے، اوہدے وچ سلمان اکرم راجہ، بیرسٹر گوہر، محمود اچکزئی شامل نیں، اے سب علیمہ خان دے احتجاج توں ناخوش نیں۔ سلمان اکرم، بیرسٹر گوہر تے محمود اچکزئی چاہندے نیں کہ سانوں کمپرومائز (سمجھوتہ) کر لینا چاہیدا اے پر عمران خان تے علیمہ خان کمپرومائز نہیں کرنا چاہندے۔ اسی وجہ توں علیمہ خان دے خلاف 26 نومبر لانگ مارچ کیس چل پیا اے، سُنیا اے اگلے مہینے فیصلہ آؤن والا اے، لگدا اے علیمہ خان نوں سزا ہو جائے گی، گرفتار ہو کے جیل چلی جانگیاں۔ بیرسٹر گوہر کوشش کر رہے نیں کہ انج نہ ہووے، تھوڑی بہت گنجائش نکلے۔

میرا خیال اے کہ اسٹیبلشمنٹ سُنن لئی تیار نہیں، اوہنے پی ٹی آئی بارے جیہڑی پالیسی اپنائی ہوئی اے، اوہدے وچ بالکل کوئی لچک نہیں۔ بیرسٹر گوہر تے ہور لوکاں نے بڑی کوشش کیتی اے، ایتھوں تیکر کہ علی امین گنڈاپور نے کوشش کیتی سی، ہݨ سہیل آفریدی وی کر رہے نیں کہ کوئی لچک نکلے پر اسٹیبلشمنٹ نہیں من رہی۔ تن سالاں توں دیکھ رہے ہاں یہی ہو رہیا اے، اگے وی یہی ہووے گا، ملک وچ کوئی تبدیلی آئی تاں اوہ تحریکِ انصاف نہیں لیائے گی۔