آن لائن حج رجسٹریشن، عازمین دی گنتی (تعداد) 3 لکھ توں ودھ گئی

2 لکھ 22 ہزار سرکاری، 86 ہزار دا پرائیویٹ سکیم دا انتخاب، رجسٹریشن ڈاڈھی سوکھی، حج واجبات آن لائن وصول کیتے جاݨ دا امکان، مرد عازمین دی گنتی سوانیاں توں زیادہ

اسلام آباد (سید قیصر شاہ) حج 2027 توں 2030 لئی آن لائن حج رجسٹریشن لئی گھر بیٹھے رجسٹرڈ ہوݨ والے عازمین دی گنتی 3 لکھ 8 ہزار توں ٹپ (تجاوز کر) گئی اے، جدکہ دوجے مرحلے وچ وزارت مذہبی امور ولوں حج واجبات وی آن لائن وصول کیتے جاݨ دا امکان اے۔ 2 لکھ 22 ہزار نے سرکاری جدکہ 86 ہزار نے پرائیویٹ سکیم دی چوݨ (انتخاب) کیتی اے۔ رجسٹرڈ عازمین وچ اک لکھ 81 ہزار مرد تے اک لکھ 27 ہزار سوانیاں نیں۔ 61 سال توں وڈی عمر دے عازمین حج دی گنتی 40 ہزار اے، جدکہ 33 سال توں 44 سال دے عازمین دی گنتی ہݨ تیکر سبھ توں زیادہ اے، جنہاں دی تعداد ہݨ تیکر اک لکھ وِیہہ ہزار اے۔

رجسٹرڈ عازمینِ حج وچ 3500 پی ایچ ڈی، 53 ہزار ماسٹرز تے 71 ہزار بیچلرز تعلیم والے لوک شامل نیں۔ حج پورٹل یا موبائل ایپ “پاک حج” راہیں رجسٹریشن دا کم ڈاڈھا سوکھا بنایا گیا اے، نیشنل آئی ٹی بورڈ دا تیار کیتا ہویا حج مینجمنٹ سسٹم عازمینِ حج تے وزارت وچالے رابطے دا اک سوکھا ذریعہ بن گیا اے۔