لاہور وچ روٹی دی قیمت 4 روپے، نان دی قیمت 10 روپے ودھ گئی۔
ملک وچ کنک تے آٹے دی قیمت ودھن نال روٹی تے نان دی قیمت وی ودھن لگی اے، تندور مالکان نے سرکاری ریٹ دی پرواہ نہ کردے ہوئے روٹی دی قیمت ودھا دتی اے۔
لاہور وچ کنک تے آٹے دیاں ودھدیاں قیمتاں نوں جواز بنا کے نان بائی ایسوسی ایشن نے روٹی دی قیمت پہلے 14 روپے توں 20 روپے تے نان 30 روپے وچ ویچن دا اعلان کیتا سی۔
ایس تے انتظامیہ خاموش رہی، ہن متحدہ نان بائی ایسوسی ایشن دا کہنا اے کہ 20 کلو آٹے دی قیمت 2400 روپے تے میدہ 12 ہزار روپے ہون تے نان 35 روپے وچ تے سادہ روٹی 25 روپے وچ فروخت کرن جا رہے آں، جے روکیا گیا تے احتجاجاً تندور بند کر دیاں گے۔
نان بائی ایسوسی ایشن دا کہنا اے کہ مہنگے آٹے، مہنگی ایل پی جی (LPG) تے شاپر بیگاں دے نال سرکاری ریٹ تے 16 روپے دی روٹی نہیں ویچ سکدے، حکومت تن دناں وچ مذاکرات کرے۔
ضلعی انتظامیہ دا کہنا اے کہ جڈوں اک واری قیمت ودھ چکی اے تے دوبارہ ودھان دا کوئی جواز نہیں، عوام نوں سستی روٹی توں محروم نہیں ہون دیاں گے، قیمتاں وچ یکطرفہ اضافے تے کارروائی ہووے گی۔
دوجے پاسے کراچی دے وکھ وکھ علاقیاں وچ وی روٹی دی قیمت وچ 5 روپے دا اضافہ کر دتا گیا اے تے 20 روپے والی روٹی 25 روپے وچ فروخت ہو رہی اے۔
