ساڈی مرضی توں بغیر آبنائے ہرمز وچ کسے وی سرگرمی دا انتہائی سخت جواب دتا جائے گا: ایرانی فوج دا ٹرمپ دے بیان تے ردعمل
امریکی صدر ڈونلڈ ٹرمپ دے آبنائے ہرمز تے کنٹرول حاصل کرن دے بیان توں بعد ایرانی فوج دا ردعمل سامنے آ گیا اے۔
ایرانی فوج نے اک بیان وچ واضح کیتا کہ اوہ امریکہ نوں کسے وی صورت وچ آبنائے ہرمز وچ مداخلت دی اجازت نہیں دین گے، ایران دی مرضی توں بغیر آبنائے ہرمز وچ کسے وی سرگرمی دا انتہائی سخت جواب دتا جائے گا۔
ایرانی فوج نے خطے دے ملکاں نوں پیغام دتا کہ امریکہ دی حمایت تے اوہدا ساتھ دین نوں ایران دے خلاف جنگ سمجھیا جائے گا، نال ہی خبردار کیتا کہ جے کشیدگی وچ اضافہ ہویا تے ایہ خطے دے دوجے ملکاں تیکر پھیل جائے گی تے ایس دی مکمل ذمہ داری امریکہ تے اوہدے اتحادیاں تے عائد ہووے گی۔
یاد رہے کہ امریکی صدر ڈونلڈ ٹرمپ نے میڈیا نال گل بات کردے ہوئے آکھیا سی کہ اسیں آبنائے ہرمز تے کنٹرول حاصل کر رہے آں، اسیں آبنائے ہرمز دے سرپرست بنیں گے، سانوں آبنائے ہرمز دی نگرانی دے بدلے معاوضہ ملے گا۔
امریکی صدر نے آکھیا ساڈا ایران نال معاہدہ ہویا جیہڑا اوہناں نے توڑ دتا، اوہ برے بندیاں دا اک گروپ اے، اسیں کل رات ایران نوں بہت شدید حملیاں دا نشانہ بنایا۔
صدر ٹرمپ نے آکھیا اوہ ہمیشہ معاہدہ توڑ دیندے نیں ایس لئی ہن اسیں اوہناں نوں سخت نشانہ بناواں گے، اسیں آبنائے ہرمز نوں اپنے کول رکھاں گے تے شاید ایہنوں اسیں ای چلائیے۔
