او آئی سی کانفرنس مُک گئی، سوانیاں نوں بااختیار بنان دا عزم
پاکستان نے دو سال لئی او آئی سی وزارتی کانفرنس سوانیاں دی سربراہی سانبھ لئی، عورتاں نوں ترقی دے عمل وچ پورا شامل کیتا جائے گا: اعظم نذیر تے دوجیاں دی پریس کانفرنس
اسلام آباد (وقائع نگار، اے پی پی)
اسلامی تعاون تنظیم (OIC) دی دو روزہ نوویں وزارتی کانفرنس برائے سوانیاں اسلام آباد وچ مُک گئی اے۔ پاکستان نے اگلے دو سالاں لئی او آئی سی دی سوانیاں توں متعلق وزارتی کانفرنس دی سربراہی سانبھ لئی اے۔
ایس کانفرنس وچ عورتاں دے معاشی استحکام، ڈیجیٹل شمولیت، تعلیم، قیادت، کاروباری موقعیاں تے فیصلہ سازی دے عملاں وچ سوانیاں دی ودھدی ہوئی شرکت ورگے اہم معاملیاں اُتے وچار کیتا گیا۔ ایس دے نال ای او آئی سی دے رکن دیساں ولوں سوانیاں دے حقاں دی حفاظت تے اوہناں نوں بااختیار بنان لئی سانجھے عزم نوں دہرایا گیا۔
کانفرنس دے ختم ہون اُتے او آئی سی دے اسسٹنٹ سیکرٹری جنرل طارق علی بخیت، سیکرٹری خارجہ آمنہ بلوچ تے دوجے رہنماواں نال پریس کانفرنس کردیاں وفاقی وزیرِ انسانی حقوق اعظم نذیر تارڑ نے آکھیا:
“کانفرنس دی سربراہی باضابطہ طور اُتے پاکستان دے حوالے کر دتی گئی اے، جیہڑی اسلامی تعاون تنظیم دے رکن دیساں ولوں پاکستان اُتے بھرپور اعتماد دا ثبوت اے۔”
اوہناں نے آکھیا کہ اختتامی بیٹھک وچ کانفرنس دی مشاورتی سفارشان دی منظوری دتی گئی، جس وچ ساریاں دیساں نے مسلم دنیا وچ سوانیاں دے معاشی، سیاسی تے سماجی اختیارات ودھان دے عزم نوں دہرایا۔ اوہناں دا کہنا سی کہ عورتاں نوں ترقی دے کماں وچ پورا شامل کیتا جائے گا تاں جے اوہ مرداں دے موڈھے نال موڈھا جوڑ کے خوشحال تے برابری والے معاشرے دی تعمیر وچ اپنا حصہ پا سکن۔
رکن دیساں نے عزم کیتا کہ سوانیاں نوں نویاں مہارتیاں تے جدید ٹیکنالوجی نال لیس کرن لئی سارے دستیاب وسائل ورتے جان گے۔
کانفرنس دے خطاب تے اہم نکتے
- وزیرِ قانون اعظم نذیر تارڑ: سوانیاں دی ترقی مسلم دنیا دی خوشحالی دی ضمانت اے۔ ہر عورت تے بچی نوں تعلیم، ترقی تے قیادت دے اکو جیسے موقعے ملنے چاہیدے نے۔
- طارق علی بخیت (اسسٹنٹ سیکرٹری جنرل OIC): سانوں موسمیااتی تبدیلی، غربت تے عورتاں تے بچیاں دے خلاف ہر قسم دے تشدد، خاص طور اُتے ڈیجیٹل تشدد دی تشویشناک صورتحال دا ڈٹ کے مقابلہ کرنا پئے گا۔
- چیئرمین سینیٹ یوسف رضا گیلانی: سوانیاں دا بااختیار ہونا پائیدار ترقی لئی بہت ضروری اے۔
