مزاراں دے نذرانیاں وچ غبن، محکمہ اوقاف دے افسراں تے ملازماں نوں ریکوری نوٹس جاری
داتا دربار، میاں میر، بی بی پاک دامن، بابا بلھے شاہ تے اوکاڑہ کرپشن کیساں وچ سخت کارروائی؛ افسراں تے ملازماں نوں کروڑاں دی ریکوری دے حتمی نوٹس جاری
وزیراعلیٰ مریم نواز دے “کرپشن توں پاک پنجاب” وژن دے تحت ایکشن؛ اپیلیٹ اتھارٹی دے ساہمنے دائر اپیلاں دا فیصلہ قانون دے مطابق کیتا جائے گا: محکمہ اوقاف پنجاب
لاہور
محکمہ اوقاف تے مذہبی امور پنجاب نے کرپشن، مالی بے ضابطگیاں تے مزاراں دے نذرانیاں تے غلّے دی رقم وچ ملوّث افسراں تے کارندیاں دے خلاف “زیرو ٹالرنس” (عدم برداشت) پالیسی دے تحت سخت کارروائی کردیاں کروڑاں روپے دی ریکوری دے حتمی نوٹس جاری کر دتے نے۔
محکمہ اوقاف دے ترجمان مطابق، ایہ احتسابی عمل وزیراعلیٰ پنجاب مریم نواز شریف دے “کرپشن توں پاک پنجاب” دے وژن تے چیف سیکرٹری پنجاب زاہد اختر زمان دیاں خصوصی ہدایتاں اُتے کیتا جا رہیا اے تاں جے سرکاری خزانے نوں نقصان پہنچان والیاں دا بلاامتیاز احتساب کیتا جا سکے۔
مختلف کیساں تے ملزمان دی تفصیل تھلے دتی گئی اے:
1۔ داتا دربار لاہور کیس
- ملزم: طاہر مقصود (سابق مینیجر اوقاف، نوکری توں برخاست)
- الزام: عرس مبارک دے دوران بے ضابطگیاں تے کیش ریکوری وچ ہیرا پھیری۔
- ریکوری نوٹس: 1 کروڑ 13 لکھ 24 ہزار 867 روپے تے 18 لکھ 71 ہزار 591 روپے دی ریکوری دے نوٹس جاری۔
- دوجا ملزم: شیخ جمیل احمد (سابق ایڈمنسٹریٹر، موجودہ جونیئر سکیل سٹینوگرافر سرگودھا زون)۔
- ریکوری نوٹس: 92 لکھ 65 ہزار 800 روپے تے 28 لکھ 7 ہزار 386 روپے دی ریکوری دے نوٹس۔
2۔ دربار حضرت میاں میر لاہور کیس
- ملزم: حافظ جاوید شوکت (سابق ریسرچ اسسٹنٹ، مرکزِ معارفِ اولیاء)
- الزام: عرس مبارک تے عید میلاد النبیؐ دے موقع اُتے مالی بے ضابطگیاں۔
- ریکوری نوٹس: 43 لکھ 18 ہزار 851 روپے تے 21 لکھ 3 ہزار 265 روپے دے نوٹس۔
3۔ اوکاڑہ کرپشن کیس
- ملزم 1: شفقت عباس (سابق مینیجر اوقاف، برخاست شدہ)۔ ریکوری نوٹس: 12 لکھ 4 ہزار 780 روپے تے 35 لکھ 28 ہزار 181 روپے۔
- ملزم 2: زوار حسین (سابق رینٹ کلرک، موجودہ جونیئر کلرک)۔ ریکوری نوٹس: 12 لکھ 4 ہزار 780 روپے۔
- ملزم 3: عامر ستار (سابق سینئر کلرک، برخاست شدہ)۔ دو مختلف فیسلیاں دے تحت 36 لکھ 14 ہزار 341 روپے تے 71 لکھ 11 ہزار 281 روپے دی ریکوری دی سزا۔
