ڈپٹی کمشنرز خراب پانی والے علاقوں کی نشاندہی کریں: مریم نواز
واٹر فلٹریشن پلانٹاں دی بندش دور کرن تے دوروں پانی لے کے آؤن والے علاقیاں دی نشاندہی دا حکم؛ ‘مریم نواز سینٹر آف اکیڈمک لیڈرشپ’ پائلٹ پراجیکٹ منظور؛ سٹیڈیم، گھڑ سواری تے سوئمنگ پول بنن گے
لاہور :
وزیراعلیٰ پنجاب مریم نواز شریف نے ہر ضلعے دے ڈپٹی کمشنر نوں خراب پانی والے علاقیاں دی نشاندہی کر کے فوراً رپورٹ پیش کرن دی ہدایت کر دتی اے۔ ضلعی انتظامیہ نوں اوہناں علاقیاں دا پتہ لاؤن دا حکم وی دتا گیا اے جتھے لوکاں نوں پین لئی صاف پانی دور دوجیاں جگہواں توں لے کے آؤنا پیندا اے۔ وزیراعلیٰ نے صاف پانی دی کمی والے علاقیاں وچ پین دے صاف پانی دی لوڑ دا اندازہ لاؤن دا حکم وی جاری کیتا۔
وزیراعلیٰ پنجاب مریم نواز شریف دی صدارت ہیٹھ اک اہم اجلاس ہویا جس وچ پورے صوبے وچ واٹر فلٹریشن پلانٹاں دی بحالی دا جائزہ لیا گیا۔ اجلاس وچ بریفنگ دیندیاں دسیا گیا کہ پنجاب دے زیادہ خراب پانی والے علاقیاں وچ بوٹلنگ پلانٹ چالو کر دتے گئے نیں۔ خوشاب، ڈی جی خان، بہاولپور تے رحیم یار خان وچ بوٹلنگ پلانٹ تیار نیں، جتھے خراب پانی والے علاقیاں وچ پانی دیاں بوتلاں ٹرکاں راہیں پہنچائیاں جان گئیاں۔ خوشاب بوٹلنگ پلانٹ دی ڈیجیٹل رپورٹ وی پیش کیتی گئی، جس دی ہر گھنٹے وچ 50 ہزار لیٹر پانی تیار کرن دی صلاحیت اے۔ وزیراعلیٰ نے خوشاب، ڈی جی خان، رحیم یار خان تے بہاولپور دے ڈپٹی کمشنراں توں فوراً رپورٹ منگ لئی اے۔
صاف پانی پراجیکٹ دے اہم فیصلے:
- نویں پلانٹ: ‘سی ایم پنجاب صاف پانی پراجیکٹ’ دے تحت ہور 4 بوٹلنگ پلانٹ لان دا فیصلہ کیتا گیا اے۔
- فلٹریشن پلانٹ: پورے صوبے وچ 2258 واٹر فلٹریشن پلانٹ لگائے جان گے۔
- پہلا مرحلہ: پہلے مرحلے وچ بہاولپور ڈویژن وچ 22 تے راجن پور وچ 10 کلسٹر بیسڈ پلانٹ لگائے جان گے۔
- شکایات دا ازالہ: وزیراعلیٰ نے خراب یا بند پئے واٹر فلٹریشن پلانٹاں دی شکایت فوری دور کرن دا حکم دتا۔
مریم نواز سینٹر آف اکیڈمک لیڈرشپ:
سکول ایجوکیشن دے حوالے نال ہون والے اجلاس وچ مریم نواز سینٹر آف اکیڈمک لیڈرشپ بارے تفصیلی بریفنگ دتی گئی۔
سیٹاں: بریفنگ وچ دسیا گیا کہ اس سینٹر وچ 5,000 منڈے تے 5,000 کڑیاں (کل 10,000 طالب علم) داخلہ لے سکن گے۔
نویں سکول: وزیراعلیٰ نے پنجاب وچ ‘ایچی سن کالج’ دے پدھر (لیول) دے منڈیاں تے کڑیاں لئی سکول قائم کرن دی منظوری دے دتی اے۔
پہلا پراجیکٹ: لاہور دے وحدت روڈ اُتے طالب علماں تے طالبات لئی پہلا ‘مریم نواز سینٹر آف اکیڈمک لیڈرشپ’ قائم کرن دا فیصلہ کیتا گیا اے تے اس پائلٹ پراجیکٹ دی منظوری دے دتی گئی اے۔
سہولتاں: اس سینٹر وچ جدید ترین سپورٹس ہال، ہاکی تے کرکٹ سٹیڈیم بنایا جائے گا۔ اس توں علاوہ طالب علماں لئی گھڑ سواری (ہارس رائیڈنگ) تے سوئمنگ پول دی سہولت وی ہوئے گی۔
