پروکیورمنٹ رولز دے تحت قائم فورمز پورے بااختیار نیں: لاہور ہائیکورٹ
قانونی فورمز ٹیکنیکل ایویلیوایشن کمیٹی دے فیصلے برقرار، تبدیل تے کالعدم کر سکدے نیں، منیجنگ ڈائریکٹر پی پی آر اے دا فیصلہ نظرِ ثانی عمل دا حصہ، انٹرا کورٹ اپیل خارج
لاہور (کورٹ رپورٹر):
لاہور ہائیکورٹ نے پنجاب پبلک پروکیورمنٹ ریگولیٹری اتھارٹی دے تحت سرکاری خریداری نال متعلق مقدمے وچ اہم قانونی فیصلہ سناندیاں ہویاں قرار دتا اے کہ پروکیورمنٹ قوانین دے تحت جے پورا قانونی فورم موجود ہووے تاں انٹرا کورٹ اپیل دائر نہیں کیتی جا سکدی۔
لاہور ہائیکورٹ دے جسٹس چودھری سلطان محمود تے جسٹس ملک محمد اویس خالد تے مشتمل دو رکنی بینچ نے نجی کمپنی ولوں دائر انٹرا کورٹ اپیل تے فیصلہ سنایا۔ عدالت دے ساہمنے دسیا گیا کہ محکمہ صحت پنجاب نے مالی سال 2025-26 لئی طبی آلات، سرجیکل ڈسپوزایبل شیواں، امپلانٹس تے سیوچرز دی خریداری لئی ای-ٹینڈر جاری کیتا سی۔ ٹیکنیکل ایویلیوایشن کمیٹی نے جانچ پڑتال توں بعد کجھ کمپنیاں دیاں بولیاں (bids) نوں تکنیکی طور تے غیر موزوں (unfit) قرار دتا۔ متعلقہ کمپنیاں نے منیجنگ ڈائریکٹر پنجاب پبلک پروکیورمنٹ ریگولیٹری اتھارٹی نال رابطہ کیتا۔
اوہناں نے دوواں فورمز دے فیصلے کالعدم قرار دیندیاں ہویاں اوہناں نوں تکنیکی طور تے اہل قرار دتا تے خریداری دا کم قانون دے مطابق اگے ودھاؤن دی ہدایت کیتی۔ اس فیصلے دے خلاف دائر آئینی درخواست سنگل بینچ نے مسترد کر دتی سی، جس توں بعد درخواست گزار نے انٹرا کورٹ اپیل دائر کیتی۔
دو رکنی بینچ نے اپنے تفصیلی فیصلے وچ قرار دتا کہ پنجاب پروکیورمنٹ رولز 2014 دے رول 67 تے رول 67-A دے تحت دتے گئے قانونی فورمز نرے رسمی نہیں بلکہ پورا قانونی اختیار رکھدے نیں؛ ایہ فورمز ٹیکنیکل ایویلیوایشن کمیٹی دے فیصلے دا نویں سرے توں جائزہ لے سکدے نیں، اوہنوں برقرار رکھ سکدے نیں، تبدیل کر سکدے نیں یا کالعدم قرار دے سکدے نیں۔
عدالت نے قرار دتا کہ منیجنگ ڈائریکٹر پی پی آر اے دا فیصلہ اصل حکم نہیں بلکہ قانونی نظرِ ثانی دے عمل دا حصہ اے، عدالت نے انٹرا کورٹ اپیل خارج کر دتی۔
