مذاکرات ورنہ ایرانی بجلی گھراں، پُلاں اُتے حملے: ٹرمپ، فی الحال گل بات دا کوئی ارادہ نہیں، دھیان صرف دفاع اُتے: ایران، تجارتی لنگھگاہواں بند کرن دی دھمکی

امریکہ دے حملے، جنوبی ایران وچ 30 شہری، بامپور وچ 7 فوجی جاں بحق، شہدا دا بدلہ یقینی اے، تیل تے گیس دی برآمدات دا راہ یا تے سبھ لئی ہوئے گا یا کسے لئی نہیں: پاسدارانِ انقلاب، ایرانی ڈیجیٹل اثاثے منجمد، ناکہ بندی مکمل، خام تیل دیاں قیمتاں بلند ترین پدھر اُتے، تہران وچ ٹرمپ دے تابوت والے بل بورڈ آویزاں، ملک دے اک اک انچ دا دفاع کراں گے: ایرانی صدر

واشنگٹن، تہران (نیوز ایجنسیاں) امریکہ تے ایران وچکار جاری جنگ اک نویں تے انتہائی خطرناک مرحلے وچ داخل ہو گئی اے، صدر ٹرمپ نے دھمکی دتی اے کہ جے ایران نے مذاکرات شروع نہ کیتے تے ایرانی بجلی گھراں تے پُلاں اُتے حملے کیتے جان گے، جدکہ ایران نے آکھیا اے کہ فی الحال مذاکرات دا کوئی ارادہ نہیں، سارا دھیان دفاع اُتے اے۔ ایران نے ہور تجارتی لنگھگاہواں بند کرن دی دھمکی وی دتی اے۔ امریکی فوج نے بدھ دے دن ایران دے ساحلی دفاعی نظام تے کروز میزائلوں دے ٹھکانیاں اُتے ہوائی حملیاں دی اک نویں لہر شروع کیتی اے، ایران دی پاسدارانِ انقلاب نے امریکی حملیاں دے جواب وچ خطے وچ موجود امریکی فوجی اثاثیاں اُتے میزائل داغے نیں، بدھ دے دن اردن، بحرین تے کویت وچ امریکی فوجی ٹھکانیاں نوں نشانہ بنایا گیا۔ ایرانی وزارتِ خارجہ دے ترجمان اسماعیل بقائی دا کہنا اے کہ ساڈا فی الحال مذاکرات دا کوئی ارادہ نہیں اے تے ساری توجہ صرف دفاع اُتے لگی ہوئی اے۔

ایران ولوں دنیا دی سبھ توں اہم سمندری لنگھگاہ “آبنائے ہرمز” نوں بند کرن دے اعلان توں بعد، ہݨ تہران نے دھمکی دتی اے کہ اوہ امریکہ تے اوہدے اتحادیاں نوں فائدہ پہنچاوان والیاں دوجیاں ساریاں سمندری تجارتی راہداریاں نوں وی بند کر دیوے گا۔ ماہرین دا مننا اے کہ ایران اپنے یمنی اتحادی حوثیاں راہیں بحیرہ احمر دے دہانے اُتے واقع “باب المندب” دی لنگھگاہ نوں نشانہ بنا سکدا اے۔ سعودی عرب نے آبنائے ہرمز دی بندش توں بعد اپنے کچے تیل دی 70 فیصد برآمدات نوں بحیرہ احمر دی بندرگاہ ‘ینبع’ منتقل کر دتا سی، پر ہݨ حوثیاں ولوں سعودی عرب اُتے میزائل حملیاں توں بعد ایہ متبادل راہ وی شدید خطرے وچ اے۔ آبنائے ہرمز وچ ایرانی فوجاں ولوں مائنز (سمندری بارودی سرنگاں) بچھائے جاݨ توں بعد، کئی بین الاقوامی شپنگ کمپنیاں نے امریکی فوج دی نگرانی وچ چلݨ والی پروٹیکشن سکیم دے باوجود اس راہ توں لنگھݨ توں انکار کر دتا اے، کیوں جے کمپنیاں نوں اپنے عملے دی حفاظت بارے شدید تحفظات نیں۔

اس شدید بحران پاروں عالمی مارکیٹ وچ خام تیل دیاں قیمتاں اک مہینے دی سبھ توں اچی پدھر اُتے پہنچ گئیاں نیں، برینٹ خام تیل دی قیمت 1.46 ڈالر یعنی 1.72 فیصد اضافے نال 86.19 ڈالر فی بیرل تک پہنچ گئی، اسے طرحاں امریکی ویسٹ ٹیکساس انٹرمیڈیٹ خام تیل دی قیمت وی 1.11 ڈالر یعنی 1.4 فیصد اضافے توں بعد 80.40 ڈالر فی بیرل ریکارڈ کیتی گئی۔ اس وڈے علاقائی معرکے دے دوران، روم وچ امریکی سفارت خانے وچ اسرائیل تے لبنان وچکار سفیراں دی پدھر اُتے ہوݨ والے مذاکرات وچ کجھ مثبت اشارے ملے نیں۔ امریکی اہلکاراں مطابق اک پائلٹ پروجیکٹ دے تحت جنوبی لبنان توں مسلح گروہاں (حزب اللہ) دے خاتمے، لبنانی فوج دی تعیّناتی تے اسرائیلی فوجاں دے ہولی ہولی باہر نکلݨ اُتے اصولی اتفاق ہویا اے۔ امریکی محکمہ خزانہ نے بدھ دے دن ایران دے ہتھیاراں دی خریداری دے عالمی نیٹ ورک اُتے نویاں پابندیاں لایاں نیں، جس وچ ایرانی تے روسی شہریاں دے نال نال ایران، روس تے نائیجیریا وچ قائم کمپنیاں نوں نشانہ بنایا گیا اے۔ ادھر ایرانی سرکاری میڈیا نے دعویٰ کیتا سی کہ امریکی حملیاں وچ ‘ہویزہ’ شہر وچ کݨک دے گودام نوں نشانہ بنایا گیا اے، پر امریکی فوج نے ایہدی تردید کردے ہوئے صاف کیتا کہ صرف ایرانی فوجی تنصیبات بشمول بندر عباس، اہواز تے قشم نوں نشانہ بنایا گیا اے۔

امریکی صدر ڈونلڈ ٹرمپ نے فاکس نیوز نوں دتے گئے اک انٹرویو وچ آکھیا کہ جے ایران معاہدے لئی مذاکرات دی میز اُتے نہ آیا تے امریکہ آؤن والے ہفتے ایران وچ اپنے حملیاں دا دائرہ ہور ودھاؤندے ہوئے بجلی گھراں تے پُلاں نوں وی نشانہ بنائے گا۔ ٹرمپ نے آکھیا کہ اگلا ہفتہ اوہناں لئی بہت ماڑا ہوئے گا، کیوں جے اگلے ہفتے بجلی گھر تے پُل وی نشانے اُتے ہوݨ گے۔ اوہناں آکھیا کہ ایران اُتے حملے اوہناں چر تک جاری رہن گے جدوں تک میں نہ آکھاں کہ ہݨ بہت اے۔ ایران وچ اجے کجھ جنگ لڑن دی صلاحیت باقی اے، پر ایہ بہت زیادہ نہیں۔ صدر ڈونلڈ ٹرمپ توں سوال کیتا گیا کہ کیا زمینی کارروائی دا امکان اے، تے اوہناں آکھیا کہ ‘میں اس بارے کجھ نہیں کہنا چاہندا، کدی زمینی آپریشن دی لوڑ پیندی اے پر ایسے لوک وی نیں جو ساڈے لئی زمینی کارروائی کرں گے۔’ ادھر ایرانی راجدھانی تہران وچ امریکہ تے ٹرمپ دے خلاف نویں بل بورڈز لائے گئے نیں جنہاں وچ ٹرمپ نوں تابوت وچ دکھایا گیا اے، پر وہاں دے مقامی لوکاں دا میڈیا نال گل بات کردے ہوئے کہنا اے کہ اوہ اس تاریخی موڑ توں سرخرو ہو کے نکلن گے۔

اس توں علاوہ امریکی فوج نے اعلان کیتا اے کہ اوہنے بدھ دے دن ایرانی ویلے مطابق دوپہر ڈیڈھ وجے ایران اُتے نویں حملے کیتے نیں۔ سینٹرل کمانڈ نے اعلان کیتا کہ ایران دی دوبارہ سمندری ناکہ بندی کر دتی گئی اے۔ ایرانی میڈیا نے خبر دتی اے کہ ملک دے جنوب وچ واقع کئی علاقیاں بشمول بندر عباس، سیریک تے اہواز وچ دھماکیاں دیاں آوازاں سنیاں گئیاں نیں۔ ہرمزگان دے گورنر دے حوالے نال دسیا گیا اے کہ بندر عباس شہر دے نیڑے اک تھاں نوں امریکی میزائلوں نال نشانہ بنایا گیا۔ ایرانی صدر مسعود پزشکیان نے امریکی صدر ڈونلڈ ٹرمپ دی دھمکیاں اُتے ردعمل دیندے ہوئے آکھیا اے کہ اپنے وطن دے اک اک انچ دا دفاع کراں گے۔ ایرانی صدر نے ٹی وی اُتے جاری اپنے بیان وچ امریکی صدر ٹرمپ دی بیان بازی نوں آڑے ہتھوں لیا تے آکھیا کہ ٹرمپ دسن کہ کیا اوہناں نے میدانِ جنگ وچ اپنے مقصد حاصل کر لئے نیں؟ ایران نوں ونڈن دی کوشش کرن والے دسن کہ اوہناں نوں آخر حاصل کیہ ہویا اے؟ ایرانی وزارتِ خارجہ نے اپنے بیان وچ امریکہ نوں سخت انتباہ دیندے ہوئے آکھیا اے کہ واشنگٹن نے دوواں ملکاں وچکار طے پاݨ والی مفاہمتی یادداشت دیاں شرطاں دی خلاف ورزی کیتی اے، جس دے جواب وچ تہران سارے ممکنہ دیسی اقدام دا حق محفوظ رکھدا اے۔

وزارت خارجہ نے آکھیا کہ امریکہ نے مفاہمتی یادداشت دیاں شرطاں توڑ دتیاں نیں، اس لئی ایران کول مناسب جواب دیݨ دے سارے راہ موجود نیں، ایرانی مسلح افواج دے ہتھ بجھے ہوئے نہیں نیں تے کسے بھی جارحیت دا بھرپور تے تکڑا جواب دتا جائے گا۔ دوجے پاسے ایرانی حکومت دی ترجمان فاطمہ مہاجرانی نے آکھیا اے کہ جنوبی ایران اُتے حالیہ امریکی حملیاں وچ 30 توں ودھ شہری ہلاک تے کئی زخمی ہوئے نیں۔ ایرانی فوج نے آکھیا اے کہ صوبہ سیستان و بلوچستان دے علاقے بامپور وچ اک فوجی چھاؤنی اُتے امریکی حملے وچ ست بندے ہلاک تے کئی زخمی ہوئے نیں، ایرانی زمینی افواج دی اک بیرک دے رہائشی حصے نوں لگ بھگ 13 میزائلوں نال نشانہ بنایا گیا۔ حملے وچ ایران دی 388ویں بریگیڈ نال تعلق رکھن والے ست اہلکار، جنہاں وچ حاضرِ سروس تے ریٹائرڈ اہلکار شامل سن، ہلاک ہوئے نیں جدکہ کئی زخمیاں نوں علاج لئی ہسپتال پہنچایا گیا اے۔ ایرانی فوج نے اپنے بیان وچ آکھیا کہ شہدا دے خون دا بدلہ یقینی اے۔

پاسدارانِ انقلاب نے اعلان کیتا اے کہ آبنائے ہرمز اوہناں چر تک بند رہے گی جدوں تک ‘دشمن’ اپنیاں کارروائیاں بند نہیں کردا۔ پاسدارانِ انقلاب نے خبردار کیتا کہ تیل تے گیس دی برآمدات دا راہ یا تے سبھ لئی دستیاب ہوئے گا یا کسے لئی نہیں، جے ایران دی تیل تے گیس دی برآمدات نوں روکن دی کوشش کیتی گئی یا اوہناں نوں لگاتار معطل رکھیا گیا تے اوہ خطے دے دوجے ملکاں دی برآمدات نوں وی متاثر کر سکدے نیں۔ اسے دوران امریکی وزیرِ خزانہ سکاٹ بیسنٹ نے آکھیا اے کہ امریکہ نے ایران دے مرکزی بینک نال جڑے 13 کروڑ ڈالر توں ودھ مالیت دے ڈیجیٹل اثاثے منجمد کر دتے نیں، اوہناں آکھیا کہ امریکہ منی لانڈرنگ دے خلاف کارروائیاں جاری رکھے گا۔ رات گئے ایرانی میڈیا نے دسیا اے کہ چابہار سمیت ایران دے مختلف شہراں وچ دھماکیاں دیاں آوازاں سنیاں گئیاں نیں۔ ایران دی سرکاری مہر نیوز ایجنسی مطابق عراق دی سرحد دے نیڑے واقع ایرانی شہر اہواز وچ دھماکیاں دیاں آوازاں سنیاں گئیاں نیں، چالو مہینے کشیدگی دوبارہ شروع ہوݨ توں بعد توں اہواز نوں کئی وار امریکی فوج دی کارروائیاں دا نشانہ بنایا جا چکیا اے۔ رپورٹ مطابق ایران دے شہر چابہار وچ اک توں بعد اک 3 دھماکیاں دیاں آوازاں سنیاں گئیاں، ایرانی میڈیا مطابق امریکی میزائلوں نے چابہار وچ واقع بحری نگرانی دے ٹاور نوں نشانہ بنایا۔