آزاد کشمیر وچ سچائی، مفاہمتی کمیشن بنایا جائے: بلاول، ایکشن کمیٹی نے لانگ مارچ روک دتا
بحران دے ذمے وار وفاقی وزیر، پرامن حل کڈھیا جائے، بندوق تے دھرنے دے زور اُتے تبدیلی نہیں کیتی جا سکدی: خطاب، چیئرمین او پی ایف دی سربراہی وچ قائم ٹیم نے مذاکرات کیتے، حکومت دا باضابطہ اعلان سامنے نہیں آیا: ذرائع
اسلام آباد (مانیٹرنگ ڈیسک، سٹاف رپورٹر) چیئرمین پاکستان پیپلز پارٹی بلاول بھٹو زرداری نے آکھیا اے کہ کشمیر دا فیصلہ کشمیری ہی کرں گے پر بندوق تے دھرنے دے زور اُتے کوئی آئینی تبدیلی نہیں کیتی جا سکدی۔ مظفر آباد وچ پیپلز پارٹی آزاد کشمیر دے پارٹی عہدیداراں تے کارکنوں نال خطاب وچ بلاول بھٹو دا کہنا سی کہ آزاد کشمیر دے خراب حالات نال کشمیر کاز نوں نقصان پہنچے گا، بلاول بھٹو نے آزاد جموں تے کشمیر دی موجودہ صورتحال اُتے اعتماد دی بحالی دے اقدامات تے فریقین نال مذاکرات دا راہ اختیار کرن دا مطالبہ کردے ہوئے حکومتِ پاکستان تے جموں کشمیر جوائنٹ عوامی ایکشن کمیٹی دی صلاح نال قومی سچائی تے مفاہمتی کمیشن قائم کرن دی تجویز دتی اے۔ اوہناں آکھیا کہ موجودہ حالات وچ معاملہ فہمی دی لوڑ اے۔
اوہناں آکھیا کہ آزاد کشمیر دا بحران وفاقی وزراء دے بیاناں پاروں پیدا ہویا، ہݨ وفاقی حکومت نوں ہی موجودہ بحران مکانا اے، کشمیریاں دے خلاف کوئی غلط زبان ورتدا اے تے ساڈا دل ٹٹ جاندا اے۔ چیئرمین پیپلز پارٹی نے آکھیا کہ اسلام آباد وچ بیٹھے کسے بندے نوں ایہ کہݨ دی اجازت نہیں کہ اوہ فیصلہ کرے کہ کون کشمیری اے تے کون نہیں، موجودہ حالات وچ رپھڑاں دا حل زور لاؤنا (طاقت دا استعمال) نہیں ہو سکدا، کشمیریاں دا پسینا وگے گا تے ساڈا خون وگے گا۔ بلاول بھٹو نے مظاہرین توں احتجاج تے دھرنے ختم کرن دی ارداس کردے ہوئے آکھیا کہ پرامن احتجاج سبھ دا حق اے پر پُرتشدد احتجاج تے مظاہریاں دی کسے حالے وی اجازت نہیں، کدی نہیں چاہواں گے کہ کشمیر وچ دہشت گردی دی سیاست پیر پسارے، بانی ایم کیو ایم نے کراچی وچ جیہو جہی سیاست کیتی میں کدی نہیں چاہواں گا کشمیر وچ ایں ہوئے، ساڈی خواہش اے کہ کشمیر دے مسئلے دا پرامن حل کڈھیا جائے۔
پاکستان دے سیاستداناں، کشمیر دے سیاستداناں تے احتجاج کرن والیاں نوں سوچنا چاہیدا اے، کشمیریاں دا مسئلہ صرف آزاد کشمیر وچ حل کرن دے حق وچ واں، پر دھرنے تے بندوق دے زور اُتے آئین وچ ترمیم نہیں ہو سکدی۔ اوہناں دا کہنا سی کہ افواجِ پاکستان ساڈی ریڈ لائن اے، اوہناں دے خلاف کوئی گل برداشت نہیں کیتی جائے گی، کوئی کدی وی ریاست نوں جھکا نہیں سکدا، امن قائم کرن وچ فیلڈ مارشل دا کردار سبھ دے سامنے اے۔ اس دوران کالعدم جوائنٹ عوامی ایکشن کمیٹی دی کور تے مذاکراتی کمیٹی دے ناں اپنے خط وچ بلاول بھٹو نے آزاد جموں تے کشمیر دی موجودہ حالت اُتے اعتماد دی بحالی دے کم تے سارے فریقاں نال مذاکرات دی راہ اختیار کرن دا مطالبہ کردے ہوئے حکومتِ پاکستان تے جموں کشمیر جوائنٹ عوامی ایکشن کمیٹی دی صلاح نال قومی سچائی تے مفاہمتی کمیشن قائم کرن دی تجویز دتی اے۔
بلاول بھٹو نے آکھیا کہ آزاد کشمیر وچ لگاتار جانی نقصان قومی سانحہ اے، ہر کشمیری دی جان قیمتی اے تے پرامن شہریاں نوں دہشت گرد یا باہرلے ایجنٹ قرار دینا ٹھیک نہیں۔ اوہناں آکھیا کہ مظاہرین تے قانون لاگو کرن والے اداریاں دے خلاف سارے الزاماں دی غیر جانبدارانہ جانچ ہونی چاہیدی اے۔ موجودہ بحران طاقت دی ورتوں یا بھڑکاؤ بیاناں نال حل نہیں ہو سکدا، اس لئی پرانے معاہدیاں، مقدمیاں، پابندیاں تے دوجے متنازع معاملیاں دا حل شفاف تحقیقات تے مذاکرات راہیں کڈھیا جائے۔ بلاول بھٹو نے تجویز دتی کہ متوقع سچائی تے مفاہمتی کمیشن نوں وڈے اختیارات دتے جاݨ تاں جے اوہ سارے سچاں دا جائزہ لے کے عمل جوگ سفارشاں پیش کرے۔ بلاول بھٹو نے آکھیا کہ جے سارے فریق اس تجویز نال راضی ہوݨ تے پاکستان پیپلز پارٹی بحران دے پرامن، منصفانہ تے پکے حل لئی اپنا بھرپور کردار ادا کرے گی۔
مظفر آباد (بیورورپورٹ) کالعدم جوائنٹ عوامی ایکشن کمیٹی تے چیئرمین اوورسیز پاکستانیز فاؤنڈیشن سید قمر رضا دی سربراہی وچ قائم مذاکراتی ٹیم وچکار ہوݨ والے مذاکرات توں بعد کالعدم ایکشن کمیٹی نے اپنا متوقع لانگ مارچ اک ہفتے لئی پچھے پاݨ (مؤخر کرن) دا اعلان کر دتا۔ ذرائع مطابق فریقین وچکار لنگھے پیر توں مذاکرات دے کئی دور ہوئے جیہدے توں بعد پیش رفت سامنے آئی، کالعدم ایکشن کمیٹی نے اپنے مطالبات وی پیش کیتے۔ ذرائع دا کہنا اے کہ مذاکرات دا کم اجے جاری رہے گا، پر حکومت ولوں کالعدم ایکشن کمیٹی نال مذاکرات، مطالبات دی منظوری یا اوہناں اُتے عملدرآمد بارے اجے تک کوئی باضابطہ اعلان سامنے نہیں آیا۔
