قدرتی وسائل قوم دی امانت، پوری ایمانداری نال حفاظت کراں گے: مریم نواز
چیف منسٹر پنک سالٹ ویلیو ایڈیشن فنانسنگ سکیم دا ڈیجیٹل اجرا، پراسیسنگ زون بناؤن دا اعلان، منڈی بہاؤالدین دے ارکانِ اسمبلی دی ملاقات، اوکاڑہ تے دوجے اضلاع وچ گرین بس سروس دا افتتاح
لاہور، اوکاڑہ (نیوز ایجنسیاں، نامہ نگار)
وزیراعلیٰ پنجاب مریم نواز شریف نے پنک سالٹ (گلابی نمک) دے ذخائر توں صنعت، روزگار تے برآمدات وچ اضافے لئی “چیف منسٹر پنک سالٹ ویلیو ایڈیشن فنانسنگ سکیم” دا آغاز کر دتا اے۔ وزیراعلیٰ نے اس سکیم دا ڈیجیٹل اجرا کیتا۔ اس موقعے اُتے اوہناں نے پنجاب وچ قائد آباد دے نیڑے 110 ایکڑ زمین اُتے “پنک سالٹ منرل پراسیسنگ زون” قائم کرن دا اعلان وی کیتا۔ وزیراعلیٰ نے آکھیا کہ اس فنانسنگ سکیم راہیں روزگار دے نویں موقعے تے ریونیو ودھے گا۔ پنک سالٹ دے ذخائر نال صنعتکاری، روزگار تے برآمدات وچ وادھا ہوئے گا۔ پنک سالٹ اُتے ہݨ “میڈ ان پاکستان” ہی لکھیا جائے گا۔ قدرتی وسائل قوم دی امانت نیں، پوری ایمانداری نال ایہناں دی حفاظت کراں گے۔ وزیراعلیٰ مریم نواز شریف نے ہور آکھیا کہ ویلیو ایڈیشن فنانسنگ سکیم نال پنک نمک دی پیکنگ، پراسیسنگ تے سجاوٹی چیزاں (ڈیکوریشن پیسز) دی عالمی برآمدات ودھن گیاں۔ اللہ تعالیٰ نے پنجاب نوں دنیا دے بہترین پنک سالٹ ذخائر نال نوازیا اے۔
پاکستان دا پنک سالٹ دنیا بھر وچ اپنے معیار تے انوکھے معدنی اجزا پاروں سبھ توں بہترین منیا جاندا اے۔ چیف منسٹر پنک سالٹ ویلیو ایڈیشن فنانسنگ سکیم دی افتتاحی تقریب وچ بریفنگ دوران دسیا گیا کہ پنک سالٹ منرل پراسیسنگ زون وچ 200 توں ودھ یونٹ لائے جاݨ گے۔ 150 ملین دی سرمایہ کاری تے 10 ہزار لوکاں لئی روزگار دے سدھے موقعے پیدا ہوݨ گے، نویں سرمایہ کار سالٹ پراسیسنگ، گرائنڈنگ، ریفائننگ، کلیننگ تے پیکجنگ لئی قرضہ لے سکن گے۔ پنک سالٹ فنانسنگ سکیم دے قرضے دی ادائیگی آسان قسطاں وچ 5 سالاں وچ ہوئے گی۔ پہلے فیز وچ پنک سالٹ دی بولی 471 ملین تک ہوئی، دوجے فیز وچ 2.5 ارب روپے دی پیشکش مل چکی اے۔ مائنز اینڈ منرلز ڈیپارٹمنٹ وچ لیز تے لائسنس دی نیلامی ڈیجیٹل طریقے اُتے منتقل کرن نال ریونیو وچ چنگا بھلا اضافہ ہویا اے۔
سرمایہ کار (انویسٹر)، مائنز اینڈ منرلز دی ویب سائٹ https://pinksalt.punjab.gov.pk اُتے آن لائن اپلائی کر سکدے نیں. اسے دوران وزیراعلیٰ نال منڈی بہاؤالدین دے رکن صوبائی اسمبلی خالد محمود رانجھا تے اختر عباس بوسال نے ملاقات کیتی تے اپنے حلقیاں پی پی 42 تے 43 دی عوامی لوڑاں تے رپھڑاں توں جانو کروایا۔ وزیراعلیٰ نے ارکانِ اسمبلی دے پیش کیتے گئے عوامی مسائل حل کروان دی ہدایت دتی، جدکہ ارکانِ اسمبلی نے وزیراعلیٰ نوں منڈی بہاؤالدین وچ الیکٹرو بس سروس شروع کرن اُتے خراجِ تحسین پیش کیتا تے چھوٹے وڈے شہراں نوں خوبصورت بناؤن (بیوٹیفکیشن) دے کماں نوں وی سلاہیا۔ وزیراعلیٰ نے آکھیا کہ منڈی بہاؤالدین سمیت دوجے اضلاع لئی ہور الیکٹرو بسیں وی لیا رہے ہاں، عالمی پدھر اُتے “اپنی چھت، اپنا گھر” پروگرام، سیف سٹی تے “ستھرا پنجاب” دی پذیرائی گڈ گورننس دی بہترین مثال اے۔
دوجے پاسے وزیراعلیٰ مریم نواز نے اوکاڑہ سمیت کئی اضلاع وچ گرین بس سروس دا ویڈیو لنک راہیں باضابطہ افتتاح کیتا، اس موقعے اُتے ڈی سی عثمان جاوید، ڈی پی او ڈاکٹر اسد اعجاز ملہی تے دوجے افسراں نے گرین بساں وچ بہہ کے شہر دا دورہ وی کیتا۔ وزیراعلیٰ نے “ورلڈ یوتھ سکلز ڈے” اُتے اپنے پیغام وچ صوبے دے نوجواناں نوں ٹیکنالوجی تے پیشہ ورانہ مہارتوں نال لیس کرن دے عزم نوں دہرایا تے نوجواناں نوں فری لانسنگ، آئی ٹی تے ٹیکنیکل شعبیاں وچ شامل ہوݨ دی ہدایت کردے ہوئے آکھیا کہ ٹیکنالوجی تے پیشہ ورانہ مہارتوں توں فائدہ چکن والے نوجوان ہی ملک دی ترقی تے خوشحالی وچ وڈا کردار ادا کر سکدے نیں۔ اس توں علاوہ وزیراعلیٰ نے مریدکے وچ بساں دی ٹکر وچ قیمتی انسانی جاناں دے ضیاع اُتے دکھ دا اظہار کردے ہوئے سوگوار خانداناں نال ہمدردی تے تعزیت کیتی تے زخمیاں نوں بہترین علاج معالجہ دیݨ دی ہدایت دتی۔
