حجیاں دی کھلریاں رہائشاں تے ماڑی خوراک، کمیٹی ولوں فکرمندی دا اظہار
واپسی دیاں پروازاں وچ بدانتظامی رہی: ممبران، حجیاں نوں بہتر سہولتاں دتیاں: سردار یوسف، رہائش دی شفاف ونڈ، ڈیجیٹل نگرانی تے نویں حج پالیسی پہلے کمیٹی وچ پیش کرن دی سفارش
اسلام آباد (سید قیصر شاہ)
قومی اسمبلی دی قائمہ کمیٹی برائے مذہبی امور تے بین المذاہب ہم آہنگی نے حج 2026 دی کارکردگی دا جائزہ لیندے ہوئے حج 2027 دیاں تیاریاں اُتے تفصیل نال غور کیتا۔ کمیٹی ممبراں نے حجیاں دی رہائش وکھو وکھریاں تھاواں اُتے ہوݨ، ماڑی (غیر معیاری) کیٹرنگ تے واپسی دیاں پروازاں وچ بدانتظامی اُتے فکرمندی (تشویش) دا اظہار کیتا۔ بلیک لسٹ کیٹرنگ کمپنیاں ولوں غیر معیاری خوراک دتی گئی تے واپسی دیاں فلائٹاں وچ بدانتظامی پاروں سوشل میڈیا اُتے سخت تنقید ہوئی۔ کمیٹی نے سفارش کیتی کہ رہائش تے کیمپاں دی ویلے سِر خریداری لئی اک اثر دار حج پروکیورمنٹ کمیٹی بݨائی جائے، رہائش دی شفاف ونڈ، ڈیجیٹل نگرانی تے شکایت دے نظام نوں ہور مضبوط کیتا جائے، جدکہ نویں حج پالیسی منظوری توں پہلاں قائمہ کمیٹی ساہویں پیش کیتی جائے۔
اجلاس کمیٹی دی چیئرپرسن شگفتہ جمانی دی صدارت ہیٹھ ہویا۔ وفاقی وزیرِ مذہبی امور سردار محمد یوسف نے بریفنگ وچ دسیا کہ حج 2026 کامیابی نال پورا ہویا، وزیراعظم دی خاص دلچسپی پاروں حجیاں نوں بہتر سہولتاں دتیاں گئیاں تے لنگھے ورھے دے مقابلے وچ شکایت چوکھی گھٹ آئی۔ اوہناں دسیا کہ حج 2027 لئی تن لاکھ توں ودھ درخواستاں آ چکیاں نیں جیہڑیاں سرکاری حج سکیم اُتے لوکاں دے بھروسے دی نشانی نیں۔ ڈی جی حج (جدہ) نے دسیا کہ ایس ورھے تقریباً اک لاکھ 19 ہزار پاکستانیاں نے سرکاری حج سکیم تھلے حج دا فریضہ ادا کیتا، جدکہ پاکستانی حج مشن نوں لگاتار دوجے سال سعودی عرب ولوں “لبیتم ایکسی لینس ایوارڈ” نال نوازیا گیا۔ نویں ڈیجیٹل نظام تے ریئل ٹائم مانیٹرنگ نال انتظامات وچ بہتری آئی تے شکایتاں گھٹ ہوئیاں۔
کمیٹی نے مجموعی طور اُتے حج انتظامات دی تعریف کردے ہوئے رہائش، ٹرانسپورٹ، کیٹرنگ تے خریداری دے نظام نوں ہور بہتر بناؤن اُتے زور دتا۔ اجلاس وچ اربعین دے موقعے اُتے نجف اشرف جاݨ والے زائرین دے ہوائی کرائے دا معاملہ وی زیرِ بحث آیا۔ چیئرپرسن نے آکھیا کہ کجھ انٹرنیشنل ایئر لائنز ساڈی قومی ایئر لائن دے مقابلے وچ فی مسافر تقریباً اک لاکھ روپے گھٹ کرایہ لے رہیاں نیں۔ اوہناں نے وزارت نوں ہدایت کیتی کہ متعلقہ وزارت تے قومی ایئر لائن نال رابطہ کر کے زائرین نوں ریلیف دیݨ لئی چھیتی قدم چکے جاݨ۔ اقلیتی ممبراں دے ترقیاتی فنڈاں وچ واجھے (اضافے) دی سفارش وی کیتی گئی، جدکہ وزارت نوں ایویکیو ٹرسٹ پراپرٹی بورڈ تے اقلیتی ترقیاتی فنڈ اُتے تفصیلی بریفنگ دیݨ دی ہدایت کیتی گئی۔
