محرم جلوساں دے لائسنس جاری کرن بارے نویں پالیسی بناؤن دا حکم

پنجاب حکومت چار مہینے وچ جامع پالیسی تیار کر کے اگلے محرم توں پہلاں نافذ کرے

تجدید، منسوخی تے لائسنس ہولڈر دے مرن توں بعد طریقہ کار صاف کیتا جائے: ہائیکورٹ

لاہور (کورٹ رپورٹر)

لاہور ہائیکورٹ دے جسٹس انوار حسین نے حکومتِ پنجاب نوں محرم وچ جلوساں دے لائسنس جاری کرن بارے نویں پالیسی بناؤن دا حکم دے دتا اے۔ عدالت نے حکم دتا اے کہ پنجاب حکومت چار مہینے دے اندر اک جامع پالیسی بنا کے اگلے محرم توں پہلاں نافذ کرے، پالیسی وچ نویں لائسنس، تجدید (رینیوول)، معطلی، منسوخی تے اصل لائسنس ہولڈر دے مرن (انتقال) توں بعد دا طریقہ کار وی صاف صاف دسیا جائے۔ محرم دے جلوساں بارے ورھیاں پرانی پالیسی تے نویں سرے توں غور کیتا جائے، جلوساں دے نویں لائسنس دتی جان تے پکی پابندی لاؤنا ٹھیک نہیں۔

عدالت دا آکھنا سی کہ فوت ہون والے بندے دے ناں تے جلوس دا لائسنس بحال نہ کرنا قانون دے مطابق نہیں، جلوس دا لائسنس کوئی وراثتی حق نہیں ہوندا پر لائسنس ہولڈر دی وفات نال مذہبی حق مک نہیں جاندے۔ محرم دے جلوس عام عوامی کٹھے (اجتماعات) نہیں ہوندے بلکہ ایہہ آئین دے تحت مذہبی آزادی نال جڑے معاملے نیں، ہر سال محرم توں پہلاں عدالتوں نال رابطہ کرن دا رواج مکنا چاہیدا اے، حکومت جلوساں بارے ویلے سر طریقہ کار طے کرے۔ ہوم ڈیپارٹمنٹ تریخی جلوساں دے لائسنس، نویں لائسنس تے رپھڑ والے (متنازعہ) دعویاں بارے واضع پالیسی بنائے۔ اک پدھرا (متوازن) تے عمل کرن جوگا نظام بنانا حکومت دی ذمہ داری اے۔