دہری شہریت رکھن والے پاکستانیاں لئی نویں سفری گائیڈ لائنز جاری

زائد المیعاد یا منسوخ شدہ نائیکوپ والے پاکستانی ملک وچ داخل نہیں ہو سکن گے، نویں گائیڈ لائنز نافذ

ایف آئی اے نے ایئر لائنز نوں سختی نال عملدرآمد کرن دی ہدایت کر دتی

اسلام آباد (مانیٹرنگ ڈیسک)

وفاقی تحقیقاتی ایجنسی (FIA) نے دوہری شہریت رکھن والے پاکستانیاں لئی نویں سفری گائیڈ لائنز جاری کر دتیاں نیں۔

ایف آئی اے دے مطابق ہن کوئی وی پاکستانی زائد المیعاد (ایکسپائرڈ) یا منسوخ (کینسل) شدہ نائیکوپ (NICOP) نال بیرون ملک توں پاکستان وچ داخل نہیں ہو سکے گا، ایہہ پابندی برطانیہ تے امریکہ سمیت دنیا دے سارے ملکاں توں آؤن والے مسافراں تے لاگو ہوئے گی۔

حکام دے مطابق غیر ملکی پاسپورٹ دے نال پاکستانی ویزا یا فیر کارآمد (ویلڈ) نائیکوپ دا ہونا لازمی ہوئے گا۔ ساریاں ایئر لائنز نوں نویں گائیڈ لائنز بارے دَس دتا گیا اے تے ایہو جہے مسافراں نوں جہاز وچ سوار (بورڈ) نہ کرن دی ہدایت کیتی گئی اے۔

ایف آئی اے حکام دا کہنا اے کہ زائد المیعاد یا کینسل شدہ نائیکوپ والے پاکستانیاں نوں اگلی فلائٹ توں واپس بھیج دتا جائے گا۔ پہلے ایئر لائنز ایہو جہے مسافراں نوں وی لے کے پاکستان آ جاندیاں سن، پر ہن ایئر لائنز نوں نویں گائیڈ لائنز تے سختی نال عمل کرن دا آکھیا گیا اے۔ وزارتِ داخلہ نے نویں سفری اصولاں بارے امیگریشن حکام نوں وی دَس دتا اے تے ملک دے سارے ہوائی اڈیاں (ایئرپورٹس) تے نویں گائیڈ لائنز نافذ کر دتیاں گئیاں نیں۔