نواز شریف تے مریم نواز دا متوقع دورہِ مظفر آباد، حتمی شیڈول لئی اہم مشاورت اج ہوئے گی!
قائد مسلم لیگ (ن) میاں محمد نواز شریف تے وزیراعلیٰ پنجاب مریم نواز دے متوقع دورۂ مظفرآباد دے شیڈول نوں حتمی شکل دین لئی اہم مشاورت اج ہوئے گی۔
ذرائع دے مطابق وفاقی وزیر بین الصوبائی رابطہ رانا ثناء اللہ خان تے وفاقی وزیر امور کشمیر انجینئر امیر مقام اج مظفرآباد پہنچن گے، وفاقی وزراء مظفرآباد وچ مسلم لیگ (ن) مظفرآباد ڈویژن دی مرکزی قیادت نال اہم اجلاس کرن گے۔
اجلاس وچ صدر مسلم لیگ (ن) آزاد کشمیر شاہ غلام قادر، سابق وزیراعظم راجہ محمد فاروق حیدر خان، بیرسٹر افتخار گیلانی، راجہ ثاقب مجید دی شرکت دا امکان اے۔ چوہدری محمد رشید، نورین عارف، مصطفیٰ بشیر عباسی سمیت ہور رہنما وی شریک ہون گے، اجلاس وچ قائد مسلم لیگ (ن) میاں محمد نواز شریف دے متوقع دورۂ مظفرآباد دے شیڈول نوں حتمی شکل دتے جان دا امکان اے۔
مسلم لیگ (ن) آزاد کشمیر دی انتخابی صورتحال تے حلقہ وار انتخابی مہم دا تفصیلی جائزہ اجلاس دے ایجنڈے وچ شامل اے۔ وفاقی وزراء پارٹی رہنماواں توں ہر حلقے وچ انتخابی مہم مزید مؤثر بنان لئی تجاویز وی طلب کرن گے، اجلاس وچ میاں محمد نواز شریف دے دورۂ مظفرآباد دی حتمی تاریخ دا اعلان وی متوقع اے۔
وفاقی وزراء اج رات مظفرآباد پہنچن گے تے نجی ہوٹل وچ پارٹی رہنماواں نال ملاقاتاں کرن گے۔ مسلم لیگ (ن) آزاد کشمیر دی انتخابی حکمت عملی تے آئندہ سیاسی سرگرمیاں تے اہم فیسلیاں دا بھی امکان ظاہر کیتا جا رہیا اے۔
